Эрон АҚШга “қулаш ҳолатида” эканини маълум қилди — Трамп
АҚШ президенти Теҳрон Ҳормуз бўғози бўйича мурожаат қилганини маълум қилди.
АҚШ президенти Доналд Трампнинг маълум қилишича, Эрон Қўшма Штатларга мамлакат ички сиёсий ва иқтисодий босимлар сабаб “қулаш ҳолатида” эканини билдирган.
Трамп бу ҳақда ўзининг Truth Social ижтимоий тармоғидаги саҳифасида баёнот бериб, Теҳрон АҚШдан Ҳормуз бўғози орқали кемалар ҳаракатини тезлаштиришни сўраганини қайд этган.
“Эрон бизга ҳозиргина ъқулаш ҳолатидаʼ эканини маълум қилди. Улар раҳбарият даражасида вазиятни тартибга солишга уринаётган бир пайтда биздан Ҳормуз бўғозини имкон қадар тезроқ очишимизни сўрамоқда. Менимча, улар буни уддалайди”, — деб ёзган Трамп.
Маълумотларга кўра, АҚШ ва Эрон ўртасидаги кескинлик фонида минтақада денгиз ташувлари бўйича чекловлар кучайган. 28 февралдаги операциялардан сўнг Эроннинг нефть экспорти ҳажмлари сезиларли даражада камайган.
Шунингдек, 11 апрелдан буён томонлар ўртасида музокаралар давом этаётган бўлсада, ядровий дастур ва хавфсизлик масалаларидаги келишмовчиликлар сабаб якуний келишувга эришилмаган.
