АҚШда “Грин карта” ва иммиграция визалари учун текширувлар кучайтирилди — CBS News
АҚШ Фуқаролик ва иммиграция хизмати ходимларига кучайтирилган текширувдан ўтмаган ҳар қандай аризани тасдиқлаш тақиқланади.
АҚШда иммиграция имтиёзлари учун мурожаат қилувчиларга нисбатан хавфсизлик текширувлари кучайтирилди. Бу ҳақда CBS News ички ҳужжатларга таяниб хабар берди.
Бу ўзгаришлар амалга оширилаётган пайтда айрим ишлар кўриб чиқилиши вақтинча тўхтатилмоқда.
Ҳужжатларга кўра, ўтган ҳафта АҚШ Фуқаролик ва иммиграция хизмати (USCIS) ўз ходимларига бошпана (асйлум), “грин карта” (доимий яшаш ҳуқуқи) ва АҚШ фуқаролиги каби иммиграция имтиёзлари бўйича кўриб чиқилаётган аризаларни қайтадан кучайтирилган текширувлар учун Федерал қидирув бюросига (ФҚБ) маълумотлар базасига юбориш бўйича кўрсатма берган. Ходимларга кенгайтирилган текширувлардан ўтмаган ҳеч қандай аризани тасдиқламаслик топширилган.
Маълум қилинишича, USCIS аввалдан иммиграция аризаларини миллий хавфсизлик ва жамоат нуқтаи нуқтаи назаридан текшириш учун ФҚБ базаларидан фойдаланиб келган. Бироқ янги ҳужжатлар бу текширувлар кучайтирилишига ФҚБ томонидан жиноятлар тарихи маълумотлар базасига кенгроқ кириш имконияти берилиши сабаб бўлганини кўрсатади. Бу қарор февраль ойида Трамп томонидан имзоланган фармон доирасида қабул қилинган.
Мазкур фармонга мувофиқ, Адлия вазирлиги USCIS га жиноятлар тарихи маълумотлар базасига “қонун рухсат берган энг юқори даражада” кириш имкониятини таъминлаши керак.
АҚШ Президенти фармонида таъкидланишича, “бундай жиноятчилар қаторига АҚШ иммиграция қонунларини бузган ҳолда мамлакатга кирган ёки қолган, ёхуд бошқа жиноий қонунбузарликлар содир этишга уринаётган хорижий фуқаролар кириши мумкин”.
Кучайтирилган текширувлар бармоқ излари топширилиши талаб этиладиган аризаларга, жумладан “грин карта” ва натурализация (фуқаролик олиш) жараёнларига татбиқ этилади. Шунингдек, АҚШ фуқаролари ёки “грин карта” эгалари томонидан яқин қариндошлар ёки никоҳланиш ниятидаги шахслар учун берилган кафолат аризалари ҳам мазкур текширувларга тортилади.
USCIS ходимларига агар иш бўйича ФҚБ маълумотлари-27 апрелдан олдин олинган бўлса, бармоқ излари асосидаги текширувларни қайта юбориш топширилган. Агар аризани рад этиш режалаштирилган бўлса, қайта юбориш талаб этилмайди.
Янги чоралар Трамп маъмуриятининг иммиграция имтиёзлари учун мурожаат қилувчиларни янада қатъий текшириш ва АҚШ иммиграция тизимига киришни чеклашга қаратилган сиёсати доирасидаги навбатдаги қадам сифатида баҳоланмоқда.
Трамп яна ҳокимиятга қайтганидан сўнг USCIS иммиграция аризаларини янада чуқур текширишга қаратилган қатор сиёсатларни жорий қилди. Жумладан, аризачиларнинг ижтимоий тармоқлардаги “америкага қарши” қарашлари ёки фаолияти ҳам текширила бошланган.
Шунингдек, иккинчи Трамп маъмурияти кўплаб иммиграция ишларини кўриб чиқишни секинлаштирган ёки тўлиқ тўхтатган. Хусусан, USCIS томонидан кўриб чиқиладиган барча бошпана ишларига вақтинча тўхтам қўйилган, шунингдек президент фармонида кўрсатилган 39 давлат фуқаролари учун қонуний иммиграция аризалари қабул қилиниши ҳам тўхтатилган. Бу чекловлар “travel ban” номи билан маълум.
