Энергетика вазирининг Отабек Бакировнинг танқидий постлари юзасидан шикояти қайта кўриб чиқилмоқда
Вазир иқтисодчи устидан аввалги шикояти бўйича жиноят иши қўзғатиш рад этилганидан сўнг, ИИОга яна мурожаат қилган.
Энергетика вазири Жўрабек Мирзамаҳмудов томонидан иқтисодчи Отабек Бакировга қарши Тошкент шаҳар ИИББга берилган навбатдаги шикоят юзасидан иш қайта кўриб чиқилмоқда. Бу ҳақда иқтисодчи Тelegram-каналида маълум қилди.
Маълум қилинишича, вазир аввалги мурожаати бўйича жиноят иши қўзғатиш рад этилганидан сўнг, 2024 йил 26 декабрда “бакироо” Телеграм каналида эълон қилинган бир нечта постларга ҳуқуқий баҳо бериш ва чора кўришни сўраб ички ишлар органларига яна мурожаат қилган.
Ушбу ҳолат бўйича қарийб 14 ой ўтгач, 2026 йил 23 январда Тошкент шаҳар ИИББ жиноят иши қўзғатишни рад этиш ҳақида қарор қабул қилган.
Бироқ, 2026 йил 25 март куни Тошкент шаҳар прокуратураси рад этиш қарорини бекор қилгани маълум бўлди. Ҳозирда иш Яшнобод туман ИИБга ўтказилган ва қайта кўриб чиқилмоқда.
Иқтисодчига кўра, шикоят 2024 йил декабрь ойида метан заправкаларида газ мавжудлиги ва навбатлар ҳақида маълумот бериши айтилган Авто24 иловасига билдирилган эътирозлар, шунингдек, Тошкент туманида “режага чиқиш” мақсадида газ ва электр таъминотининг узилишлари ҳақидаги чиқишлар билан боғлиқ.
“Қизиғи, шикоят ва қайта очилган иш яна қарийб 1,5 йил аввалги чиқишлар билан боғлиқ ва ўзгаришсиз жиҳати шундаки, мазкур пост ёзилаётган кунда ҳам свет уч марта, қарийб 4 соатга ўчди”, деб ёзди Бакиров.
