Тошкентда банкдан қарздор фуқаро машинасидан айрилди
Маълум бўлишича, фуқаро банкдан автокредит олиб, уни вақтида тўламай келган.
Мажбурий ижро бюросининг Мирзо Улуғбек туман бўлими иш юритувида фуқаролик ишлари бўйича Шайхонтоҳур туманлараро судининг ижро варақасига асосан қарздор фуқародан ундирувчи банк фойдасига жами 168 786 251 сўм қарз ундириш ҳамда ундирувни JETOUR русумли автотранспорт воситасига қаратиш белгиланган ижро ҳужжати мавжуд.
Мазкур ҳолатнинг келиб чиқиш сабаби шундаки, фуқаро ушбу автотранспорт воситасини банкдан автокредит асосида харид қилган бўлса-да, кредит тўловларини ўз вақтида амалга оширмаган. Натижада қарздорлик юзага келиб, суд қарорига асосан ижро ҳаракатлари бошланган.
Ижро ҳужжати ижросини таъминлаш мақсадида давлат ижрочиси томонидан қарздорга тегишли JETOUR русумли автомашина қидирувга берилган. Олиб борилган чора-тадбирлар натижасида ушбу транспорт воситаси йўл ҳаракати жараёнида аниқланиб, белгиланган тартибда ушлаб қолинган ва 2026 йил 22 апрель куни хатланиб, жарима майдонига жойлаштирилган.
Шу билан бирга, ўрганишлар давомида аниқланишича, қарздор томонидан 2025 йилдан буён йўл ҳаракати қоидаларини бузганлик учун белгиланган маъмурий жарималар ҳам ўз вақтида тўланмаган. Бу ҳолат ҳам фуқаронинг мавжуд мажбуриятларига етарли даражада эътибор қаратмаганини кўрсатади.
Ҳозирги кунда давлат ижрочиси томонидан ушбу автотранспорт воситасини қонунчиликда белгиланган тартибда “аукцион савдолари”га чиқариш орқали қарздорликни ундириш чоралари кўрилмоқда.
