Тошкентда МИБ ходими доставкачи ролини ўйнаб, қарздор отани қўлга туширди
Эркак 3 йил давомида алимент тўламай, МИБ ходимларидан яшириниб келган.
Мажбурий ижро бюросининг Олмазор туман бўлими иш юритувида ФИБ Шайхонтоҳур туманлараро судининг 23.02.2023 йилдаги суд буйруғига асосан қарздор И.Қ.дан ундирувчи Х.Қ. фойдасига 2 нафар вояга етмаган фарзандлари учун иш ҳақининг 1/3 қисми миқдорида алимент ундириш тўғрисидаги ижро ҳужжати мавжуд.
Ижро ҳужжатига кўра, 24.02.2023 йилдан 27.04.2026 йилга қадар жами 36 000 000 сўм алимент қарздорлиги тўпланган. Аммо қарздор ота ўз фарзандлари олдидаги бурчини бажариш ўрнига, алимент тўлашдан бўйин товлаб, узоқ вақт давомида яшириниб юрди. Шу сабабли 2026 йил январь ойида унга нисбатан қидирув эълон қилинди.
Шунда давлат ижрочилари оддий излаш билан чекланиб қолмади. Қарздор яшаб турган хонадонга “овқат етказиб берувчи” сифатида кириб борилганида, у буни оддий хизмат деб ўйлади. Аммо эшик ортида уни ўз фарзандлари ҳақини талаб қилиб келган давлат ижрочиси турган эди. Шу жойнинг ўзида қарздор ушланди.
Натижада жавобгарликка тортилиши мумкинлигини англаган қарздор ота тўпланган 36 000 000 сўм алимент қарздорлигини тўлиқ қоплади.
