АҚШдан депортация қилинган 26 нафар ўзбекистонлик Ватанга қайтарилди
Рейс икки давлат идоралари ҳамкорлигида ташкил этилди.
Бугун, 1 май куни Тошкент шаҳридаги халқаро аэропортга АҚШ миграция қонунчилигини бузганликда айбланиб депортация қилинган 26 нафар Ўзбекистон фуқароси олиб келинган чартер рейс қўнди. Бу ҳақда Дунё ахборот агентлиги хабар берди.
Маълум қилинишича, мазкур рейс Ўзбекистон ва АҚШнинг тегишли идоралари ўртасидаги ҳамкорлик асосида ташкил этилган. Жараёнда фуқароларнинг шахсини аниқлаш, ҳужжатларини расмийлаштириш ҳамда уларни хавфсиз тарзда Ватанга қайтариш бўйича барча зарур ташкилий ва ҳуқуқий тартиб-таомиллар мувофиқлаштирилган ҳолда амалга оширилган.
Расмий маълумотларга кўра, Ўзбекистон миграция соҳасида хорижий ҳамкорлар билан ўзаро алоқаларни изчил ривожлантириб, ноқонуний миграциянинг олдини олиш ҳамда чет элдаги фуқароларининг ҳуқуқ ва қонуний манфаатларини ҳимоя қилишга алоҳида эътибор қаратмоқда.
