Трампнинг ўғиллари Қозоғистондаги кончилик лойиҳасига сармоя киритди — Financial Times
Skyline Builders орқали Kaz Resources'нинг 20 фоиз улуши сотиб олинган.
АҚШ президенти Доналд Трампнинг ўғиллари — Эрик Трамп ва Доналд Трамп кичик Қозоғистонда вольфрам қазиб олиш билан боғлиқ лойиҳага сармоя киритгани маълум бўлди. Бу ҳақда Financial Times нашри манбаларга таяниб хабар берди.
Нашр маълумотига кўра, 2025 йил август ойида ака-укалар Skyline Builders қурилиш гуруҳида улуш сотиб олган. Кейинчалик мазкур компания кончилик соҳасидаги Kaz Resources корхонасининг 20 фоиз улушини қўлга киритган.
Шунингдек, 30 апрель куни Cove Kaz Capital ва Kaz Resources компаниялари Skyline билан бирлашиш бўйича келишувга эришгани билдирилган. Янги тузилма келгусида NASDAQ биржасида Kaz Resources бренди остида савдога чиқиши режалаштирилмоқда.
Қайд этилишича, бирлашув ҳақидаги расмий пресс-релизда Трампнинг ўғиллари номи тилга олинмаган.
