Наманганда алимент тўламай юрган аёл кафедан топилди
Маълум бўлишича, у узоқ вақт давомида давлат ижрочиларидан яшириниб юрган.
Наманган вилоятида алимент тўлашдан бўйин товлаб юрган фуқарони қидириш бўйича олиб борилган чора-тадбирлар самара берди. Бюронинг Чортоқ туман бўлими томонидан қидирув эълон қилинган М.А. узоқ вақт давомида давлат ижрочиларидан яшириниб юрган.
Маълумотларга кўра, қарздор фуқаро алимент тўловларини ўз вақтида амалга оширмагани сабабли унга нисбатан қидирув ишлари бошланган. Шундан сўнг масъул идоралар томонидан унинг эҳтимолий ҳаракатланиш йўналишлари ва яшаш жойлари ўрганилиб, тезкор-қидирув тадбирлари изчил давом эттирилган.
Олиб борилган изланишлар натижасида у Наманган шаҳри Давлатобод туманида жойлашган “Яшил бозор” атрофида кўрингани аниқланган. Кейинчалик, ушбу ҳудуддаги кафелардан бирида бўлиши мумкинлиги ҳақида маълумот келиб тушган.
Бошқарма қидирув инспекторлари томонидан ўтказилган тадбирда қарздор аёл айнан шу кафе ичида топилди. У шу заҳотиёқ давлат ижрочиларига топширилди.
Ҳозирда ушбу ҳолат юзасидан қонунчиликка мувофиқ тартибда чоралар кўрилмоқда.
