Фарғонада 90 дан ортиқ хонадонни сув босди
Ҳозирда кучли ёғингарчилик оқибатлари бартараф этилмоқда.
Жорий йилнинг 1 май куни соат 21:41 да “112” тизими орқали Фарғона вилоятининг Бешариқ туманида кучли ёғингарчилик кузатилгани ҳамда унинг оқибатида туманнинг “Ворух Дашт” ва “Янгиқўрғон” маҳалла фуқаролар йиғинларидаги айрим кўчаларда 90 дан ортиқ хонадон томорқаларига ёмғир сувлари киргани ҳақида хабар келиб тушган. Бу ҳақда Фавқулодда вазиятлар вазирлиги маълум қилди.
Маълумотга кўра, воқеа жойига зудлик билан Фарғона вилояти ФВБ, вилоят ва туман ҳокимлиги ҳамда ФВДТ хизматлари етиб бориб, оқибатларни бартараф этиш ишларини бошлаб юборган.
Ҳозирда ҳудудда сувни чиқариш, зарарланган жойларни тозалаш ҳамда аҳоли учун хавфсиз шароит яратиш бўйича зарур чоралар кўрилмоқда. Барча тегишли куч ва воситалар сафарбар этилган.
Қайд этилишича, ҳодиса оқибатида фуқаролар орасида тан жароҳати олганлар йўқ. Вазият мутасадди ташкилотлар томонидан тўлиқ назоратга олинган бўлиб, оқибатларни қисқа муддатда бартараф этиш режалаштирилган.
