Президент Шавкат Мирзиёев Самарқандда Имом Бухорий мажмуасини зиёрат қилди

3 май куни Ўзбекистон Президенти Шавкат Мирзиёев Самарқанд шаҳрига ташриф буюриб, аввало Имом Бухорий мажмуасини зиёрат қилди.

 

Эзгу анъаналарга мувофиқ, давлат раҳбари буюк муҳаддис Имом Бухорий мақбарасида Қуръон тиловат қилдириб, дуо ўқиди.

 

Қайд этилишича, мазкур мажмуа Президент ташаббуси билан буюк алломанинг ислом оламидаги юксак мавқеига муносиб тарзда қайта бунёд этилган. Зиёратчилар учун кенг ва замонавий шароитлар яратилган.

 

Сўнгги йилларда амалга оширилган кенг кўламли бунёдкорлик ишлари натижасида мажмуанинг қабул қилиш қуввати сезиларли даражада оширилди. Илгари кунига 12 минг зиёратчига хизмат кўрсатган мажмуа бугунги кунда 65 минг нафаргача ташриф буюрувчини қабул қилиш имкониятига эга.

 

Маълумотларга кўра, мажмуа қайта очилганидан кейин бир ой ичида бу ерга 1 миллиондан ортиқ маҳаллий ва хорижий зиёратчилар ташриф буюрган.

 

Ташриф давомида Президент мажмуага келувчилар учун янада қулай шароитлар яратиш, инфратузилмани кенгайтириш ва зиёрат маданиятини ривожлантириш юзасидан қатор топшириқлар берди.

 

Хусусан, автотураргоҳларни кенгайтириш, сайр ҳудудларини ободонлаштириш, дам олиш учун қулай муҳит яратиш ва бу борадаги ишларни мунтазам таҳлил қилиб бориш зарурлиги таъкидланди.

 

Шунингдек, мажмуада имом-хатиблар малакасини ошириш тизимини йўлга қўйиш, зиёратчилар учун яратилган шароитларни доимий ўрганиб бориш ҳамда қўшимча чоралар белгилаш муҳим экани қайд этилди.

 

Давлат раҳбари муқаддас қадамжоларни обод сақлаш, зиёрат маданиятини юксалтириш ва тарихий меросга ҳурмат руҳини мустаҳкамлаш ёш авлод тарбиясида муҳим аҳамият касб этишини алоҳида таъкидлади.