Ўзбекистонда 1100 нафар хонанда 6,4 млрд сўм даромад қилди
Энг юқори даромад 152 млн сўмгача етган.
Ўзбекистонда концерт-томоша фаолияти билан шуғулланувчи ижодкорлар томонидан даромадларни декларация қилиш жараёни давом этмоқда. Солиқ органлари маълумотига кўра, 2025 йил бошидан 2026 йил 1 май ҳолатига қадар 1100 нафар лицензияга эга хонанда ўз даромадлари тўғрисида йиллик декларация топширган.
Тақдим этилган маълумотларга кўра, мазкур даврда жами 6 млрд 478,5 млн сўм даромад кўрсатилган. Шундан 5 млрд 91,9 млн сўми солиққа тортиладиган даромад бўлиб, 599,7 млн сўм даромад солиғи ҳисобланган.
Хонандалар даромадлари рейтинг гуруҳлари кесимида қуйидагича тақсимланган:
47 нафар ижодкор 1 млрд 495,8 млн сўм даромад кўрсатган;
100 нафар санъаткор 901,4 млн сўм даромад қайд этган;
953 нафар ижодкор эса 4 млрд 81,3 млн сўм даромад билдирган.
Шунингдек, декларациялар таҳлили шуни кўрсатдики, аксарият ижодкорлар йилига 10 млн сўмгача даромад қайд этган. Айрим юқори тоифадаги санъаткорлар эса 152 млн сўмгача даромад олганини билдирган.
Қонунчиликка мувофиқ, мазкур тоифадаги солиқ тўловчилар ҳисобланган солиқ суммаларини 2026 йил 1 июнга қадар тўлашлари лозим.
