“6 та ҳоким қарори ҳақиқий эмас деб топилди”- ҳисобот

Тошкент шаҳар маъмурий суди 2026 йилнинг биринчи чораги якунлари бўйича ҳисобот эълон қилди.

 

Қайд этилишича, биринчи инстансияси суди 605 та ариза кўриб чиққан. Шундан 139 таси қаноатлантирилган, 351 таси рад қилинган, 64 таси иш юритувидан тугатилган ҳамда 51 таси кўрмасдан қолдирилган. Шу тариқа, кўрилган ишлар 2025 йилнинг мос даврига нисбатан 15,7 фоизга камайган.

 

Пойтахт маъмурий суди раиси ўринбосари Акрам Юсуповнинг сўзларига кўра, мансабдорларнинг хатти-ҳаракатларини қонунга хилоф деб топиш билан боғлиқ ишлар нисбатан кўпайган. 

 

“Алоҳида қайд этиладики, давлат солиқ органлари, буджетдан ташқари пенсия жамғармалари, маҳаллий ҳокимликлар, Мажбурий ижро бюролари, Қурилиш вазирлиги ва ҳудудий бошқармалари мансабдор шахсларининг хатти-ҳаракатларини қонунга хилоф деб топиш, улар томонидан чиқарилган қарорларни ҳақиқий эмас деб топиш билан боғлиқ ишлар нисбатан кўпроқ кўрилган”- дейди Юсупов.

 

Хусусан, давлат солиқ органлари билан боғлиқ 125 та иш кўриб чиқилган бўлса, уларнинг 23 таси фуқаролар фойдасига ҳал бўлган ва 15 та солиқ органларининг қарори ноқунуний деб топилган. Аризаларнинг 79 таси эса қаноатлантирилмаган. 

 

Қолаверса, буджетдан ташқари пенсия жамғармаларига берилган аризалар юзасидан 55 та иш кўрилган ва 23 таси қаноатлантирилган. 19 та шикоят рад этилган.

 

“Маҳаллий ҳокимликларга нисбатан берилган шикоятлар юзасидан 38 та  иш кўрилган. Шундан 12 таси қаноатлантирилган, Қолгани рад этилган. Қаноатлантирилганлари натижасида, 6 та ҳоким қарори ҳақиқий эмас, деб топилган”- дейди Акрам Юсупов.

 

Унинг қайд этишича, МИБга алоқадор 118 та иш кўрилган бўлиб, шундан 20 тасида фуқаролар ютиб чиққан. 71 та иш қаноатлантиришдан рад қилинган.

 

“Шунингдек, чиқарилган суд таъсир чораларининг 17 таси МИБ мансабдорлар шахсларида аниқланган қонун бузилиш ҳолатларига тўғри келади”- дейди у.