Ўзбекистонда 086-шаклдаги тиббий маълумотномани энди онлайн олиш мумкин
Мазкур ҳужжатни шакллантириш учун аввал фуқаро тиббий кўрикдан ўтган бўлиши талаб қилинади.
Ўзбекистонда 086-шаклдаги тиббий маълумотномани my.gov.uz портали орқали онлайн олиш имконияти яратилди. Бу ҳақда Ягона порталнинг Telegram-каналида хабар берилди.
Қайд этилишича, аввал мазкур ҳужжатни олиш учун фуқаролар тиббиёт муассасаларига бориб, навбат кутишга мажбур бўлган бўлса, эндиликда жараён рақамлаштирилди. Хизмат абитуриентлар, ишга кирувчилар, спортчилар, шунингдек айрим ижтимоий тоифаларга мансуб шахслар учун мўлжалланган.
Маълумотномани олиш учун фуқаро my.gov.uz порталига кириб, “Соғлиқни сақлаш” бўлими орқали тегишли хизматни танлаши ва ҳужжатни юклаб олиши мумкин.
Маълумотнома порталда шаклланиши учун фуқаро аввал тегишли тиббиёт муассасасида шифокорлар кўригидан ўтган бўлиши лозим. Шифокорлар хулосаси базага киритилгач, ҳужжатни масофадан туриб олиш имконияти яратилади.
Хабарга кўра, мазкур хизмат бепул тақдим этилади ва қўшимча ҳужжатлар талаб қилинмайди.
