Афғонистонда аёлларнинг дипломларини сертификатлаш тўхтатилди

Афғонистонда аёлларнинг академик маълумотларини текшириш ва сертификатлаш жараёни тўхтатилгани маълум қилинди. Бу ҳақда Afghanistan International нашри хабар берди.

 

Қайд этилишича, мамлакат Ташқи ишлар вазирлиги томонидан аёлларга тегишли таълим ҳужжатларини, жумладан, хорижий таълим муассасаларида олинган диплом ва сертификатларни тасдиқлаш амалиёти бекор қилинган. Кобулдаги фуқароларнинг билдиришича, вазирлик ҳудудида уларга “аёллар ҳужжатларини текшириш энди тақиқланган” экани маълум қилинган.

 

Шу билан бирга, олий таълим тизимида ҳам кенгроқ чекловлар жорий этилган. Хусусан, Афғонистон Олий таълим вазирлиги томонидан давлат университетларига хорижий ташкилотлар ва олий ўқув юртларидан келадиган академик маълумотларни тасдиқлаш бўйича сўровларга жавоб бермаслик ҳақида оғзаки кўрсатма берилгани айтилмоқда. Бу кўрсатмалар эркак ва аёл талабаларга бирдек тааллуқли бўлса-да, аёлларга нисбатан қўлланилаётган умумий таълим чекловлари фонида уларнинг имкониятлари янада қисқариши кутилмоқда.

 

Мазкур қарор натижасида афғон аёлларининг хорижда ўқишни давом эттириш, дипломларини тасдиқлаш ёки халқаро ташкилотларда иш топиш имкониятлари сезиларли даражада чекланади. Шунингдек, бу ҳолат Афғонистоннинг хорижий университетлар билан академик ҳамкорлиги ва халқаро таълим алмашинуви жараёнларига ҳам салбий таъсир кўрсатиши мумкин.

 

Манбаларга кўра, ушбу чоралар кенг жамоатчилик эътиборини жалб қилмаслик мақсадида “жим ва босқичма-босқич” тарзда жорий этилмоқда. Университет маъмуриятларига хориждан келадиган расмий сўровларга жавоб бермаслик бўйича кўрсатмалар берилгани эса амалда академик ҳужжатларнинг халқаро миқёсда тан олиниши жараёнини тўхтатиб қўяди.

 

Эслатиб ўтамиз, Афғонистонда аввал ҳам қизларнинг мактаб таълими олтинчи синфдан кейин тақиқланган, шунингдек, аёлларнинг кўплаб соҳаларда, жумладан халқаро ташкилотларда фаолият юритишига ҳам жиддий чекловлар жорий этилган эди.