Оҳангарон ва Шаҳрихонда ихтисослашган чарм саноати зоналари ташкил этилади

Президент Шавкат Мирзиёев чарм-пойабзал саноатида амалга оширилаётган ишлар ҳамда истиқболдаги режалар юзасидан тақдимот билан танишди.

 

Сўнгги йилларда соҳани қўллаб-қувватлаш, ишлаб чиқариш ҳажмини кенгайтириш ва экспорт салоҳиятини ошириш борасида изчил чоралар кўрилмоқда.

 

Жумладан, жорий йилнинг биринчи чорагида чарм саноатида ишлаб чиқариш ҳажми 962 миллиард сўмни ташкил этиб, ўсиш суръати 25 фоиздан ошди. 2030 йилга қадар ишлаб чиқариш ҳажмини 12 триллион сўмга, экспортни эса 500 миллион долларга етказиш, 12 минг янги иш ўрни яратиш режалаштирилган.

 

Шу билан бирга, мавжуд хомашё салоҳиятидан етарли даражада фойдаланилмаётгани қайд этилди. Хусусан, қўй ва эчки терисини қайта ишлаш даражаси 30 фоиз атрофида, йилига тайёрланадиган 40 минг тонна жуннинг эса атиги 15 фоизи қайта ишланмоқда.

 

Тақдимотда ишлаб чиқариш қувватларидан самарали фойдаланиш, хомашёни чуқур қайта ишлаш, тайёр маҳсулот улушини ошириш ва экспорт географиясини кенгайтириш масалалари муҳокама қилинди.

 

Ҳудудларда ихтисослашган саноат зоналарини ташкил этиш режалаштирилган. Жумладан, Тошкент вилоятининг Оҳангарон ва Андижон вилоятининг Шаҳрихон туманларида чарм-пойабзал саноатига мўлжалланган замонавий саноат зоналари барпо этилади. Ушбу зоналарда ишлаб чиқариш инфратузилмаси, логистика, дизайн ҳамда малака ошириш марказлари ташкил қилинади.

 

Оҳангаронда экологик талабларга жавоб берадиган, марказлашган сув тозалаш тизимига эга замонавий саноат зонаси барпо этилиши кўзда тутилган. Бу ерда кунига 8 минг куб метргача сувни тозалаб, қайта фойдаланиш имконияти яратилади.

 

Хомашё базасини кенгайтириш мақсадида қўшни давлатлардан терини импорт қилишни йўлга қўйиш, тадбиркорларни “ягона дарча” тамойили асосида қўллаб-қувватлаш, транспорт харажатларини компенсация қилиш каби таклифлар илгари сурилди. Шунингдек, Навоий, Қашқадарё, Сурхондарё ва Тошкент вилоятларида терини йиғиш ва бирламчи қайта ишлаш пунктларини ташкил этиш, Сирдарё вилоятида йилига 30 минг тонна жунни қайта ишлашга мўлжалланган янги комплекс барпо этиш режалаштирилмоқда.

 

Сунъий чарм ишлаб чиқаришни кенгайтириш масаласига ҳам алоҳида эътибор қаратилди. Мазкур йўналишда 7 та йирик лойиҳа амалга оширилиб, йилига 50 миллион погон метр маҳсулот ишлаб чиқариш қувватлари яратилади.

 

Давлат раҳбари соҳага берилган имтиёзлардан самарали фойдаланиш, аниқ ҳисоб-китобларга асосланган лойиҳаларни амалга ошириш ҳамда рақобатбардош маҳсулотлар ишлаб чиқаришни кенгайтириш зарурлигини таъкидлади.

 

Мутасаддиларга корхоналарни молиявий соғломлаштириш, экспортни кенгайтириш ва халқаро стандартларни жорий этиш бўйича аниқ топшириқлар берилди.