Қозоғистонда “Казцинк” заводида портлаш юз берди

Қозоғистоннинг Уст-Каменогорск шаҳрида жойлашган “Казцинк” металлургия мажмуасида юз берган портлаш оқибатида икки ишчи ҳалок бўлди, яна беш киши жароҳат олди. Бу ҳақда Теngrinews.kz хабар берди.

 

Маълум қилинишича, ҳодиса 5 май куни тутун сўргични тозалаш ишлари олиб борилаётган вақтда содир бўлган. Дастлабки маълумотларга кўра, қурилмада портлашга ўхшаш зарба юз бериб, унинг ортидан ёнғин келиб чиққан ҳамда конструкцияларнинг бир қисми қулаган.

 

Компания баёнотига кўра, жабрланганларга зарур тиббий ёрдам кўрсатилмоқда. Воқеа жойида фавқулодда хизматлар ишламоқда, оқибатларни бартараф этиш ишлари давом этмоқда. Ҳодиса юзасидан махсус комиссия тузилган бўлиб, унинг сабаблари ва тафсилотлари текширув якунларига кўра аниқланади.

 

“Казцинк” ҳалок бўлганларнинг яқинларига ҳамдардлик билдириб, жабрланганлар ва марҳумларнинг оилаларига моддий ҳамда психологик ёрдам кўрсатилишини маълум қилди.

 

Шунингдек, ваколатли органлар томонидан атроф-муҳитга таъсир ўрганилмоқда. Дастлабки хулосаларга кўра, маҳаллий миқёсда чанг чиқиши қайд этилган бўлиб, рухсат этилган меъёрлардан ошиш ва хавфли моддалар ажралиши аниқланмаган.

 

Фавқулодда вазиятлар вазирлиги маълумотига кўра, ҳодиса жойидан тўрт нафар жабрланувчи топилиб, тиббиёт муассасаларига етказилган. Қутқарувчилар, шифокорлар ва кинолог гуруҳлари жалб этилган.

 

Ҳодиса тонгда шаҳар аҳолиси орасида ҳам хавотир уйғотди — осмон сари кўтарилган қуюқ тутун ижтимоий тармоқларда кенг тарқалди.

 

Қозоғистон бош вазири Олжас Бектенов мазкур ҳолат юзасидан тегишли вазирликлар ва ҳудудий ҳокимликка зарур топшириқлар берилганини билдириб, вазият ҳукумат назоратида эканини маълум қилди.