Ўзбекистонда “Фахрий” мақоми жорий этилади

Олий Мажлис Қонунчилик палатасида “Фахрийлар тўғрисида”ги қонун лойиҳаси биринчи ўқишда кўриб чиқилди ва депутатлар томонидан қабул қилинди.

 

Қонун лойиҳаси билан фахрийлар мақоми, уларнинг тоифалари, шунингдек, соҳа ва идораларнинг ваколатлари аниқ белгиланиши назарда тутилмоқда. 

 

Ҳужжатда фахрийларнинг ҳуқуқий ҳамда ижтимоий ҳимоясини кучайтириш, уларга бериладиган имтиёз ва кафолатларни тизимлаштириш кўзда тутилган.

 

Лойиҳага кўра, муайян соҳа, тармоқ ёки касбда узоқ йиллар давомида виждонан ва намунали меҳнат қилган, давлат ҳамда жамият эътирофига сазовор бўлган фуқароларга “фахрий” мақоми берилади.

 

Мазкур мақомга эга шахслар бир қатор имтиёзлардан фойдаланиш ҳуқуқига эга бўлади. Хусусан, улар санаторий-курорт ва соғломлаштириш муассасаларида бепул даволаниш, уй-жой ва коммунал хизматлар учун компенсация тўловлари олиш, шунингдек, солиқ ва пенсия тизими доирасидаги имтиёзлардан фойдаланиш имконига эга бўлади.

 

Шунингдек, фахрийларнинг амбулатор даволаниш жараёнида дори воситалари билан имтиёзли таъминланиши, маданият ва кўнгилочар муассасалар — театрлар, спорт иншоотлари, музейлар ҳамда моддий маданий мерос объектларидан имтиёзли фойдаланиши ҳам назарда тутилмоқда.

 

Қонун лойиҳасида фахрийларни ижтимоий қўллаб-қувватлаш тизимини мустаҳкамлаш, уларнинг ҳуқуқ ва кафолатларини қонунчилик даражасида аниқ белгилаш ҳам асосий мақсад сифатида қайд этилган.

 

Муҳокамалардан сўнг, қонун лойиҳаси депутатлар томонидан биринчи ўқишда маъқулланди.