Олий суд яна 161 нафар қатағон қурбонини оқлади
Сўнгги йилларда жами 1 236 нафар қатағон қурбони реабилитация қилиниб, оқланган.
Олий суд томонидан совет даврида асоссиз айбловлар билан жавобгарликка тортилган яна 161 нафар фуқаро оқланди. Бу ҳақда суд матбуот хизмати маълум қилди.
Қайд этилишича, мазкур жараён Шавкат Мирзиёевнинг 2020 йил 8 октябрдаги қатағон қурбонлари хотирасини абадийлаштиришга қаратилган фармойиши асосида изчил амалга оширилмоқда.
Шу мақсадда тузилган республика ишчи гуруҳи томонидан архив ҳужжатлари чуқур ўрганилиб, тарихий адолатни тиклаш ишлари кенг кўламда олиб борилмоқда. Мутахассисларга вазирлик ва идоралар архивларидан фойдаланиш имконияти яратилгани ҳам ушбу жараён самарадорлигини оширмоқда.
Маълум қилинишича, сўнгги йилларда амалга оширилган изчил ишлар натижасида илгари реабилитация қилинмаган 1 236 нафар қатағон қурбони оқланган.
Сўнгги қарорга кўра, 1920–1934 йилларда турли тузилмалар — хусусан, Фарғона махсус бўлими ҳамда Ўрта Осиё ва Қозоғистон бирлашган давлат сиёсий бошқармаси ҳузуридаги «Учлик» қарорлари асосида судланган шахсларга оид жиноят ишлари қайта кўриб чиқилди.
Улар босмачилик ҳаракатларига ёрдам бериш, қуролли гуруҳлар тузиш ва совет ҳокимиятига қарши фаолиятда айбланган эди. Мазкур ишлар қайта ўрганилиб, 2026 йил 6 май куни ўтказилган очиқ суд мажлисларида Жиноят-процессуал кодексининг тегишли моддалари асосида 8 та жиноят иши бўйича 161 нафар шахсга нисбатан оқлов ҳукми чиқарилди.
