11 май куни бошланғич синф ўқувчиларига дарслар бўлмайди, фақат юқори синфлар ўқийди
Мактабгача ва мактаб таълими вазирлиги 11 майдаги иш тартиби бўйича маълумот берди.
Мактабгача ва мактаб таълими вазирлиги 11 май куни умумтаълим мактаблари ҳамда мактабгача таълим ташкилотлари фаолияти юзасидан маълумот берди.
Қайд этилишича, Президент фармонига мувофиқ, 9 май — Хотира ва қадрлаш куни беш кунлик иш ҳафтасида ишлайдиган ходимлар учун шанба кунига тўғри келгани сабабли дам олиш куни 11 май — душанбага кўчирилган.
Шунга кўра, 11 май куни умумтаълим мактабларида шу кунга белгиланган дарс машғулотлари ўтказилади. Бунда бошланғич синф ўқувчилари бундан мустасно экани маълум қилинди.
Вазирлик ахборотига кўра, давлат мактабгача таълим ташкилотларида эса 11 май дам олиш куни ҳисобланади. Нодавлат таълим муассасаларида дам олиш кунлари ички тартиб-қоидаларга мувофиқ белгиланади.
Эслатиб ўтамиз, Президент фармонига асосан:
9 май, шанба — одатий дам олиш куни;
10 май, якшанба — одатий дам олиш куни;
11 май, душанба — кўчирилган дам олиш куни этиб белгиланган.
Мазкур тартибга кўра, ҳафтасига 5 кун ишлайдиган ходимлар кетма-кет 3 кун, 6 кун ишлайдиганлар эса кетма-кет 2 кун дам олади.
Шунингдек, фармонга мувофиқ, иш ҳафтасининг туридан қатъи назар барча ходимлар учун 28 ва 29 май қўшимча дам олиш кунлари этиб белгиланган. Олти кунлик иш ҳафтасида ишлайдиган ходимлар учун эса 30 май куни ҳам дам олиш куни бўлади.
