Хитойнинг собиқ мудофаа вазири ўлим жазосига ҳукм қилинди
Собиқ вазир пора олиш ва беришда айбдор деб топилган.
Хитойда ҳарбий суд собиқ мудофаа вазири Ли Шанфуни коррупция билан боғлиқ жиноятларда айбдор деб топди деб хабар беради РИА Новости, Хитой Марказий телевидениесига таяниб.
Маълумотларга кўра, у пора олиш ва пора бериш ҳолатларида айбланиб, икки йиллик кечиктириш билан ўлим жазосига ҳукм қилинган.
Қайд этилишича, белгиланган икки йиллик муддатдан сўнг жазо муддатидан олдин озод қилиш имкониятисиз умрбод қамоқ жазосига алмаштирилади.
Суд қарорига мувофиқ, Ли Шанфу сиёсий ҳуқуқлардан умрбод маҳрум этилган ҳамда унинг барча шахсий мол-мулки мусодара қилинади.
Генерал Ли Шанфу 2023 йил март ойида Хитой мудофаа вазири лавозимига тайинланган эди. Орадан бир неча ой ўтиб, 2023 йил октябрь ойида у барча давлат ва ҳарбий лавозимларидан озод қилинган.
2024 йил июнь ойида эса унга нисбатан коррупция билан боғлиқ тергов бошланиб, у Хитой Коммунистик партияси сафидан чиқарилган.
