Нью-Йорк суди Жеффри Эпштейннинг сўнгги хатини эълон қилди

АҚШнинг Нью-Йоркдаги федерал суди молиячи Жеффри Эпштейн томонидан ёзилгани айтилаётган ва “ўз жонига қасд қилиш хати” сифатида таърифланаётган ҳужжатни оммага эълон қилди. Бу ҳақдa Reuters хабар берди.

 

Қўлёзма шаклидаги ҳужжатда, жумладан, “Хайрлашиш вақтини ўзинг танлаш имконига эга бўлиш — бу бир имтиёз” деган жумла келтирилган.

 

Жеффри Эпштейн 2019 йил август ойида Манҳаттендаги қамоқхона камерасида ўлик ҳолда топилган эди. Расмийлар унинг ўлимини ўз жонига қасд сифатида баҳолаган.

 

Суд ҳужжатларига кўра, ушбу ёзув Эпштейннинг собиқ камерадоши, қотилликда айбланган собиқ полициячи Николас Тартаглиёне томонидан топилган. У Эпштейн билан 2019 йил июль ойида тахминан икки ҳафта бир камерада сақланган.

 

АҚШ округ судьяси Кеннет Карас мазкур ҳужжат Тартаглиёне иши материалларига алоқадор бўлгани сабабли ошкор этилиши мумкин деган қарорга келган. Ҳужжат The New York Times сўровига жавобан эълон қилинган.

 

Судья қарорида ҳужжатни махфий сақлаш учун ҳуқуқий асос мавжуд эмаслиги қайд этилган. Шу билан бирга, суд унинг ҳақиқийлиги ёки сақланиш тарихи бўйича баҳо бермаган.

 

Сариқ блокнотга ёзилган матнда Эпштейн ўзига қўйилган айбловлар ҳақида ёзиб, “Мендан нима кутяпсиз — йиғлаб юборайми?! Йўқ, бунга арзимайди!” деган жумлаларни ҳам қолдиргани айтилмоқда.

 

Жеффри Эпштейн аввал 2008 йилда Флоридада вояга етмаган шахсдан фоҳишалик хизматларини талаб қилганликда айбини тан олиб, қисқа муддатли жазо олган. 2019 йилда эса у яна ҳибсга олиниб, вояга етмаганларни жинсий эксплуатация қилиш ва ёллаш билан боғлиқ айбловларга дуч келган.

 

Мазкур ёзув Эпштейн 2019 йил июлида камерада бўйнида излар билан тирик ҳолда топилган воқеадан кейин пайдо бўлган. Ўша ҳолат кейинчалик “ўз жонига қасд қилишга уриниш” сифатида баҳоланган. Орадан кўп ўтмай, 2019 йил 10 август куни у камерада ўлик ҳолда топилган ва ўз жонига қасд қилгани расмий равишда маълум қилинган.