Нью-Йоркда ўзбекистонлик аёлнинг ўлимига сабаб бўлган ҳайдовчи ҳибсга олинди
Мазкур иш бўйича суд мажлиси 18 майга белгиланган.
Нью-Йорк шаҳрида ўзбекистонлик аёлнинг ўлимига сабаб бўлган йўл-транспорт ҳодисаси юзасидан шаҳар транспорт департаменти ходими ҳибсга олинди деб хабар беради Slavic Sacramento.
Маълумотларга кўра, 49 ёшли Жонатан Адорно 10 март куни Квинс ҳудудида содир бўлган авариядан қарийб етти ҳафта ўтиб, 28 апрел куни қўлга олинган.
Тергов маълумотларига кўра, у самосвал бошқариб кетаётиб, чорраҳада бурилиш вақтида пиёдалар йўлагидан ўтаётган 31 ёшли ўзбекистонлик Нилуфар Комиловани уриб юборган. Ҳодиса оқибатида аёл оғир тан жароҳатлари олиб, воқеа жойида вафот этган.
Ҳайдовчига пиёдага йўл бермаслик ва эҳтиётсизлик билан ҳаракатланиш бўйича айбловлар қўйилган.
Қайд этилишича, ҳодисадан сўнг ҳайдовчи воқеа жойини тарк этмаган. Мазкур иш юзасидан Нью-Йорк автомагистрал патрул хизматининг йўл ҳаракати тергов бўлими томонидан суриштирув ишлари давом эттирилмоқда.
Навбатдаги суд мажлиси 18 май куни Квинс жиноят судида бўлиб ўтиши режалаштирилган.
