“Танқидларим Мирзамаҳмудовга қаратилмаган, ким вазир бўлса ҳам фикрларимни айтавераман” — Бакиров
Жамоатчилик фаоли Отабек Бакиров Ўзбекистонда сўз эркинлигига таъсир кўрсатаётган қонунчилик базаси юзасидан жиддий хавотирларини билдирди ва жамоатчиликнинг кенг қўллаб-қувватлаши учун чуқур миннатдорлик изҳор этди.
Энергетика вазири Жўрабек Мирзамаҳмудовнинг жамоатчилик фаоли Отабек Бакировга нисбатан даъволари бўйича иш тугатилди. Суд блогерни ёлғон ахборот тарқатиш моддаси бўйича жазога тортиш муддати ўтиб кетганлиги сабабли, маъмурий ҳуқуқбузарликка оид ишни тугатди.
Суд қароридан сўнг блогер Отабек Бакиров ўз позициясига бевосита ойдинлик киритиш учун энергетика вазири Жўрабек Мирзамаҳмудовнинг иштирок этишини кутганини билдирди. У сўнгги бир неча йил давомидаги танқидлари ҳеч қачон вазирнинг шахсиятига қаратилмаганини, балки энергетика соҳасидаги тизимли муаммоларга қаратилганини таъкидлади.
“Жўрабек Мирзамаҳмудовни яхши ота, яхши фарзанд, яхши ака, яхши ука сифатида жуда ҳурмат қиламан. Жуда яхши инсон. Умуман мен эътирозим йўқ. Менинг эътирозим тизимга. Бу вазирликка Султонов ёки бошқа вазир бўлса ҳам фикримни билдирардим”, — деди у.
Шунингдек, Бакиров Ўзбекистонда сўз эркинлигига таъсир кўрсатаётган қонунчилик базаси юзасидан жиддий хавотирларини билдирди ва жамоатчиликнинг кенг қўллаб-қувватлаши учун чуқур миннатдорлик изҳор этди. Шунингдек, блогер мамлакат энергетика сектори келажаги ҳақидаги ўз қарашлари билан ўртоқлашиб, тизимли ислоҳотлар ва шаффофликни ошириш тарафдори эканлигини айтди.
