Миллий медиада кадрлар салоҳиятини юксалтиришнинг амалий натижалари: Навоийда “Медиа ҳафталик” якунланди

 

Навоий вилоятида бир неча кун давом этган “Медиа ҳафталик” якунига етди. Тадбир миллий медиа соҳасида кадрлар салоҳиятини юксалтириш, ёш журналист ва контент-мейкерларни қўллаб-қувватлаш ҳамда тажриба алмашиш имкониятларини кенгайтиришга қаратилди.

 

               

 

Якуний босқичда ўтказилган Медиа форумда соҳа вакиллари миллий ахборот маконини замонавий талаблар асосида ривожлантириш, сифатли медиа маҳсулотлар яратиш ҳамда халқаро майдонда рақобатбардошликни ошириш масалаларини муҳокама қилдилар.

 

Тадбир доирасида Ёшлар ишлари агентлиги, Ўзбекистон Журналистлар уюшмаси ҳамда «Алоқабанк» мутасаддилари иштирокида очиқ мулоқот ташкил этилди. Унда ёш контент-мейкерлар, блогер ва журналистларни тизимли қўллаб-қувватлаш, уларнинг профессионал ўсишини таъминлаш учун тақдим этилаётган янги имконият ва имтиёзлар ҳақида батафсил сўз юритилди.

 

                   

 

Ҳафталик доирасидаги назарий билимлар амалий рағбат билан уйғунлашиб кетди. Ўзларининг креатив ёндашуви ва изланишлари учун 12 нафар фаол контент-мейкер махсус пластик карталар билан тақдирланди. Янги ғояларга очиқлиги ҳамда медиа соҳасидаги замонавий билим ва кўникмаларини оширганининг муносиб эътирофи сифатида 200 га яқин иштирокчига сертификатлар топширилди.

 

               

 

Навоийдаги мазкур “Медиа ҳафталик” турли авлод ва қарашдаги медиа вакилларини бир мақсад йўлида бирлаштирган, фикр ва тажриба алмашинувини янги босқичга олиб чиққан чинакам ижодий платформага айланди. Энг муҳими, ушбу мулоқот ва илгари сурилган ташаббуслар яқин келажакда янада сифатли, глобал миқёсда рақобатбардош ва халқчил миллий медиамизни шакллантиришда мустаҳкам пойдевор бўлиб хизмат қилиши қайд этилди.