Олмаотадаги ўзбек дипломатлари 82 нафар ватандошга ёрдам кўрсатди
Қийин вазиятга тушган ўзбекистонликларга вақтинчалик бошпана, тиббий ёрдам ва қайтиш ҳужжатлари тақдим этилди.
Қозоғистоннинг Олмаота шаҳридаги Ўзбекистон Бош консуллиги томонидан қийин ҳаётий вазиятга тушиб қолган ватандошларга кенг кўламли ёрдам кўрсатилди. Бу ҳақда «Дунё» ахборот агентлиги маълум қилди.
Қайд этилишича, сўнгги бир ой давомида дипломатлар томонидан 82 нафар Ўзбекистон фуқаросига консуллик, ҳуқуқий, молиявий ва амалий ёрдам тақдим этилган.
Жумладан, вақтинчалик яшаш жойига эга бўлмаган 11 нафар фуқаро ётоқхоналарга жойлаштирилган. Молиявий қийинчиликка дуч келган яна 13 нафар ватандошга Ўзбекистонга қайтиш учун авиачипталар олиб берилган.
Шунингдек, ноқонуний равишда ушлаб қолинган 34 нафар фуқаронинг паспортлари қайтарилишига эришилган. Шошилинч тиббий ёрдамга муҳтож бўлган бир фуқаро касалхонага ётқизилиб, даволаниш харажатлари давлат томонидан қопланган.
Бош консуллик ходимлари вақтинчалик сақлаш муассасаларида бўлган 221 нафар Ўзбекистон фуқароси билан онлайн учрашувлар ўтказиб, уларнинг ватанига қайтиши учун зарур ҳужжатларни расмийлаштирган.
Бундан ташқари, Чимкент шаҳрида кўчма консуллик қабули ташкил этилиб, 60 дан ортиқ фуқарога биометрик паспорт, фуқаролик ва қайтиш ҳужжатлари бўйича хизматлар кўрсатилган.
Дипломатлар Олмаота ва Чимкентдаги қурилиш объектларига ҳам ташриф буюриб, 170 дан ортиқ мигрант билан учрашган. Суҳбатлар давомида фуқароларга миграция қонунчилигига риоя қилиш, хориждаги меҳнат мигрантлари учун яратилаётган имкониятлар ҳамда ноқонуний ва экстремистик ташкилотлар фаолиятидан йироқ бўлиш зарурлиги тушунтирилган.
