Шавкат Мирзиёевнинг қариндоши Иккинчи жаҳон урушида 20 дан ортиқ вермахт аскарини йўқ қилган — ТАСС
Ўрунбек Ёқубов Одер дарёсини кечиб ўтиш вақтида ўз миномётидан ўт очиш орқали пиёда қўшинларни қўллаб-қувватлаб, плацдармни эгаллашга ёрдам берган.
Ўзбекистон президенти Шавкат Мирзиёевнинг амакивачча тоғаси, Совет Иттифоқи Қаҳрамони Ўрунбек Ёқубов Иккинчи жаҳон уруши даврида Одер дарёсини кечиб ўтиш операциясида вермахтнинг 20 нафардан ортиқ аскар ва офицерини йўқ қилган. Бу ҳақда ТАСС агентлиги архив ҳужжатларига таяниб хабар берди.
Маълум қилинишича, Ўрунбек Ёқубов 31-ўқчи дивизиянинг 248-ўқчи полки миномёт ротаси ҳисоб командири бўлиб хизмат қилган.
Мукофот ҳужжатларига кўра, у 1945 йил 24 январь куни Одер дарёсини кечиб ўтиш вақтида ўз миномётидан ўт очиш орқали пиёда қўшинларни қўллаб-қувватлаб, плацдармни эгаллашга ёрдам берган.
Шунингдек, Ёқубов миномётларни ғарбий қирғоққа олиб ўтиб, икки кун давомида душманнинг еттита қарши ҳужумини қайтаришда қатнашган. Ҳужжатларда унинг икки ўт очиш нуқтаси ҳамда 20 нафардан ортиқ вермахт аскари ва офицерини йўқ қилгани қайд этилган.
Ўрунбек Ёқубов 1944 йилда Днепр дарёсини кечиб ўтиш вақтида уч кун давомида душманнинг 15 та қарши ҳужумини қайтаргани учун Совет Иттифоқи Қаҳрамони унвони билан тақдирланган.
Бундан ташқари, у “Жасорат учун”, “Кавказ мудофааси учун” медаллари ҳамда Қизил Юлдуз ордени билан мукофотланган.
