Ўтмиш тажрибаси ва келажак овози: Журналистлар билан “Уч авлод учрашуви” ўтказилди
Ушбу тадбир Ўзбекистон Журналистлар уюшмаси ҳамда Контент маркази ҳамкорлигида ташкил этилди.
9 май – Хотира ва қадрлаш куни муносабати билан Ўзбекистон Республикаси Президентининг “9 май – Хотира ва қадрлаш кунига тайёргарлик кўриш ва уни ўтказиш чора-тадбирлари тўғрисида”ги қарори ижроси доирасида Ўзбекистон Журналистлар уюшмаси ҳамда Контент маркази ҳамкорлигида “Уч авлод учрашуви” маънавий-маърифий тадбири ташкил этилди.
Мазкур учрашувда узоқ йиллар оммавий ахборот воситаларида самарали фаолият юритган фахрий журналистлар, соҳа фидойилари, ўрта авлод вакиллари ҳамда журналистика йўналишида таҳсил олаётган ва соҳада фаолият кўрсатаётган ёшлар иштирок этди. Тадбир аввалида сўз олганлар Хотира ва қадрлаш кунининг мазмун-моҳияти, мамлакатда инсон қадри, устозларга ҳурмат ва тарихий хотирани эъзозлаш борасида амалга оширилаётган ислоҳотлар ҳақида алоҳида тўхталиб ўтди.
Учрашув давомида фахрий журналистлар ўзларининг босиб ўтган ҳаёт йўллари, касб фаолиятидаги мураккаб ва масъулиятли жараёнлар, ижодий изланишлар ҳамда йиллар давомида орттирилган тажрибалари ҳақида самимий ҳикоялар қилиб бердилар. Айниқса, матбуот ва журналистика соҳасининг турли даврлардаги ўзига хос жиҳатлари, касбга садоқат, сўз масъулияти ва фидойилик ҳақида билдирилган фикрлар ёшлар учун катта ҳаётий мактаб вазифасини ўтади.
Шунингдек, устоз журналистлар бугунги ёш авлоднинг интилишлари ва замонавий медиа макондаги фаоллигини юқори баҳолаб, уларга доимий ўқиш, изланиш, миллий қадриятларга содиқ қолиш ҳамда журналистиканинг асосий тамойилларига амал қилиш юзасидан тавсиялар бердилар. Самимий ва очиқ мулоқот руҳида ўтган тадбир давомида ёшлар ўзларини қизиқтирган саволларига жавоб олиб, устозлар билан эркин суҳбат қуриш имконига эга бўлдилар. Бу эса авлодлар ўртасидаги маънавий боғлиқликни янада мустаҳкамлашга хизмат қилди.
Қайд этилишича, “Уч авлод учрашуви” нафақат хотира ва қадрлаш туйғуларини юксалтирган, балки устоз-шогирд анъаналарини давом эттириш, бой тажрибани ёш авлодга етказиш ҳамда миллий журналистиканинг бардавом ривожига ҳисса қўшувчи муҳим маънавий платформага айланди.
