Тошкентда “Халқаро миграция форуми — 2026” ўтказилади
Форумда БМТ тизими, халқаро ташкилотлар, вазирликлар, экспертлар ва хорижий иш берувчилар вакиллари иштирок этади.
2026 йил 18–19 май кунлари Тошкент шаҳрида “Меҳнат мигрантлари ва уларнинг оила аъзоларининг ижтимоий-ҳуқуқий ҳимояси” мавзусида “Халқаро миграция форуми — 2026” бўлиб ўтади.
Форум Ўзбекистон Республикаси Вазирлар Маҳкамаси ҳузуридаги Миграция агентлиги ҳамда Халқаро Миграция Ташкилоти ҳамкорлигида ташкил этилмоқда.
Тадбир доирасида халқаро экспертлар иштирокидаги пленар сессиялар, меҳнат миграцияси, малакалар, гендер, ёшлар ва иқлим масалаларига бағишланган панель муҳокамалари ўтказилиши режалаштирилган.
Шунингдек, форум давомида иш берувчилар билан B2B, B2G ва G2G форматидаги учрашувлар, халқаро ва маҳаллий ОАВ вакиллари учун матбуот анжумани ҳам ташкил этилади. Янги ҳамкорлик келишувлари ва қўшма ташаббусларни илгари суриш масалаларига ҳам алоҳида эътибор қаратилади.
Форумда БМТ тизими ва халқаро ташкилотлар, давлат идоралари, Европа ва Осиё давлатларидан иш берувчилар, фуқаролик жамияти институтлари, экспертлар ҳамда оммавий ахборот воситалари вакиллари қатнашади. Тадбирда 300 дан ортиқ халқаро иштирокчи иштирок этиши кутилмоқда.
Форумнинг асосий ғояси сифатида “Хавфсиз, тартибли ва қонуний миграция — барқарор тараққиёт асоси” тамойили илгари сурилган.
Форумда иштирок этиш учун рўйхатдан ўтиш: timf.uz
