Бош прокурор иштирокида 9 май – Хотира ва қадрлаш кунига бағишланган тадбирлар ўтказилди
Тадбирлар доирасида Иккинчи жаҳон уруши йилларида хизмат қилган марҳум прокуратура фахрийларининг қабрлари зиёрат қилинди.
9 май – Хотира ва қадрлаш куни муносабати билан Бош прокурор иштирокида қатор хотира тадбирлари ташкил этилди.
Тадбир доирасида Бош прокуратура раҳбарияти ва жамоаси, фахрийлар билан биргаликда Тошкент шаҳридаги “Ғалаба боғи” ёдгорлик мажмуасига ташриф буюрди.
Анъанага мувофиқ, “Матонат мадҳияси” ёдгорлиги пойига гулчамбар қўйилиб, Ватан ҳимояси йўлида ҳалок бўлганлар хотирасига ҳурмат бажо келтирилди.
Шунингдек, илгари прокуратура органларида узоқ йиллар самарали фаолият юритган, Иккинчи жаҳон уруши йилларида жанг майдонларида жасорат кўрсатган ҳамда фронт ортида фидокорона хизмат қилиб, қонунийлик ва ҳуқуқ-тартиботни таъминлашга муносиб ҳисса қўшган марҳум прокуратура фахрийларининг қабрлари зиёрат қилинди.
