Тошкент вилоятидаги боғча болалари сутдан эмас, гўштдан заҳарланганми?
Жиноят ишлари бўйича Бўка туман судида боғчаларда болалар заҳарланганига оид навбатдаги очиқ суд бўлди.
Дастлабки тахминларга кўра, тарбияланувчилар 3,2 фоизли кефирдан заҳарланган. Ўрганишда ушбу маҳсулот Оққўрғон туманидаги цехларнинг бирида ишлаб чиқарилгани аниқланган.
Тошкент вилоятидаги мактабгача таълим муассасаларида жами 1,9 мингдан ортиқ бола заҳарланиш ҳолати юз бергандан кейин 11 нафар шахсга нисбатан хавфсизлик талабларига жавоб бермайдиган маҳсулотларни ишлаб чиқариш ва санитария қоидаларини бузишда айбланиб суд бўлиб ўтаётгани ҳақда хабар берган эдик. 1 922 нафар бола кефир истеъмолидан 2–6 соат ўтиб шифохоналарга мурожаат қилган.
Суд жараёнида айрим ота-оналар фарзандлари сут маҳсулотлари истеъмол қилмаслигини даъво қилган.
Бугун Жиноят ишлари бўйича Бўка туман суди раиси Мусо Юсупов раислигида ўтган судга Ўзбекистон РеспубликасиВетеринария ва чорвачиликни ривожлантириш қўмитаси ходимлари чақиртирилди.
Экспертлар мол гўшти ва бошқа озиқ-овқат маҳсулотларига Республика Ветеринария ва чорвачиликни ривожлантириш қўмитаси ҳузуридаги Ҳайвонот касалликларини ташхиси ва озиқ-овқат маҳсулотлари хавфсизлиги бўйича Республика давлат маркази томонидан таҳлил ўтказилган ва экспертиза хулосаси ҳақида кўрсатма берилди.
