Тошкентда ота фарзанди учун 121 млн сўм алимент олдиндан тўлади

Мажбурий ижро бюроси Мирзо Улуғбек туман бўлими иш юритувига фуқаролик ишлари бўйича Мирзо Улуғбек туманлараро судининг 30.07.2012 йилдаги ижро варақасига асосан қарздор Т.А.дан ундирувчи г.И. фойдасига вояга етмаган бир нафар фарзанди таъминоти учун даромадининг 1/4 қисми миқдорида алимент ундириш ҳақидаги ижро ҳужжати 2019 йил апрель ойида келиб тушган.

 

Шундан сўнг давлат ижрочиси томонидан қонунчиликда белгиланган тартибда ижро иши қўзғатилиб, қарздор отага алимент тўловларини ўз вақтида амалга ошириш бўйича ҳуқуқий тушунтиришлар берилган. Алимент ундирувини иш ҳақига қаратиш мақсадида иш жойига талабнома юборилиб, тўловлар мунтазам равишда ундириб келинган.

 

Бироқ бу воқеа оддий ижро ишидан кўра, инсоний масъулият ва фарзанд тақдирига бефарқ бўлмаган ота қарори билан аҳамиятли бўлди.

 

Алимент тўлови 2030 йилга қадар давом этиши белгиланган бўлса-да, қарздор ота фарзандининг келажагини ўйлаб, унинг 18 ёшга тўлгунига қадар бўлган алимент маблағларини олдиндан тўлаш истагини билдирди. Ундирувчи билан ўзаро келишувга эришилиб, давлат ижрочисининг ҳуқуқий тушунтиришлари ва амалий кўмаги натижасида 4 йиллик алимент пуллари тўлиқ ундириб берилди.

 

Шу тариқа, бир нафар фарзанд таъминоти учун жами 121 миллион сўм миқдоридаги алимент маблағи олдиндан тўлаб берилди.