Ўзбекистон корейс тили мактаблари сони ўсиши бўйича дунёда етакчи бўлди

Ўзбекистон корейс тили ўқитиладиган мактаблар сонининг ўсиши бўйича дунёда етакчи давлатга айланди. Бу ҳақда Yonhap хабар берди.

 

Маълум қилинишича, сўнгги бир йил давомида мамлакатда корейс тилига ихтисослашган синфларга эга яна 68 та таълим муассасаси ташкил этилган. 

 

Ушбу кўрсаткич бўйича Ўзбекистон Ветнам, Шри Ланка, Филиппин, Бразилия ва АҚШдан олдинга чиқди.

 

Мутахассислар корейс тилига қизиқиш ортишини ёшлар орасида Жанубий Корея маданиятининг кенг оммалашаётгани билан изоҳламоқда. 

 

Хусусан, К-поп, дорамалар ҳамда интернет платформалари бу жараёнга сезиларли таъсир кўрсатмоқда. Шунингдек, Жанубий Кореяда таълим олиш истаги ҳам тобора ортиб бормоқда.

 

Қайд этилишича, Жанубий Корея ташкилотлари томонидан таълим дастурларининг қўллаб-қувватланаётгани ҳам муҳим омиллардан бири бўлган. Лойиҳалар доирасида синф хоналари жиҳозланиб, махсус ўқув адабиётлари етказиб берилмоқда ҳамда ўқитувчилар малакаси оширилмоқда.

 

2025 йил якунларига кўра, дунё бўйлаб қарийб 2,7 мингта мактабда корейс тили ўқитилган. Сўнгги тўрт йил ичида бундай таълим муассасалари сони 54 фоизга ошган. Ҳозирда Жанубий Кореядан ташқарида корейс тилини ўрганаётган ўқувчилар сони 236 минг нафарга етган.

 

Бугунги кунда Жанубий Корея университетлари ўзбекистонлик ёшлар орасида оммабоп йўналишлардан бири ҳисобланади. Республикада қўшма таълим дастурлари ва Корея олий таълим муассасалари филиаллари фаолият юритмоқда. 

 

Турли маданий фестиваллар, тил олимпиадалари ва академик алмашинув дастурлари ҳам корейс тилини ўрганаётганлар сонининг ортишига хизмат қилмоқда.