Бозор фаолиятидаги ортиқча талаблар 30 фоизга қисқартирилади
Мажбурий талаблар ягона реестрга киритилиб, электрон мониторинг тизими жорий этилади.
Мажбурий талабларни мақбуллаштириш ва бюрократик юкни қисқартириш бўйича янги тизим жорий этилади.
Тақдимотда тадбиркорлик фаолиятига оид мажбурий талабларни қайта кўриб чиқиш ва уларни мақбуллаштириш масалалари атрофлича кўриб чиқилди.
Қайд этилишича, бугунги кунда бозорлар фаолиятига доир 20 га яқин ҳужжатда 500 дан ортиқ талаблар тарқоқ ҳолда қўлланилмоқда. Уларни тизимлаштириш орқали мавжуд талабларнинг 30 фоиздан ортиғини мақбуллаштириш имконияти мавжудлиги таъкидланди.
Шунингдек, санитария талабларига мувофиқлик бўйича далолатномаларни шакллантириш ҳамда текширувдан ўтадиган ходимлар рўйхатини электрон тизим орқали юритиш имкониятлари мавжудлиги қайд этилди.
Тақдимотда тадбиркорлик соҳасидаги барча мажбурий талабларни ягона Мажбурий талаблар реестрига киритиш, уларни амалий кўрсаткичлар асосида баҳолаш ҳамда комплекс мониторинг тизимини жорий этиш таклиф қилинди.
Бундан ташқари, БАА ва Cингапур тажрибаси асосида самарасиз, эскирган ва ортиқча бюрократик талабларни босқичма-босқич бекор қилиш, “Бизнес калькулятори”, «гилётина» усули ҳамда “one in — one out” механизмларини жорий этиш режалаштирилмоқда.
Шунингдек, ҳар бир талабнинг самарадорлигини мунтазам мониторинг қилиш ҳамда ҳар уч йилда унинг натижадорлигини қайта баҳолаш тизими йўлга қўйилиши назарда тутилган.
