АҚШ делегацияси Пекинга шахсий телефонларсиз борди
Трамп маъмурияти Хитой сафарида вақтинчалик қурилмалардан фойдаланди.
АҚШ президенти Доналд Трамп бошчилигидаги расмий делегация Хитойга ташриф давомида киберхавфсизлик чораларини кучайтирган. Fox News хабарига кўра, Пекинга ташриф буюрган америкалик амалдорлар ҳамда йирик компаниялар раҳбарлари эҳтимолий киберҳужумлар хавфи сабаб шахсий телефон ва ноутбукларидан фойдаланмаган.
Маълум қилинишича, делегация аъзолари сафар учун махсус тайёрланган вақтинчалик мобил қурилмалар ва компьютерлардан фойдаланган. Улар орасида Apple, Boeing, Qualcomm ҳамда BlackRock каби йирик корпорациялар раҳбарлари ҳам бўлгани қайд этилган.
Шунингдек, делегация вакилларига қурилмаларни USB портларига уламаслик, номаълум тармоқлардан фойдаланмаслик ҳамда маълумотлар хавфсизлигини таъминлаш бўйича махсус тавсиялар берилган.
Эслатиб ўтамиз, Доналд Трампнинг Хитойга расмий ташрифи 15 майга қадар давом этади. Ташриф доирасида АҚШ президенти ва Хитой раиси Си Цзинпин Пекиндаги Халқ йиғинлари залида музокаралар ўтказди.
