Трамп Хитойга расмий ташриф билан келди: Си Цзинпин билан музокаралар бошланди
Трамп билан бирга АҚШнинг йирик технологик ва молиявий компаниялари раҳбарлари ҳам Пекинга келди.
АҚШ президенти Доналд Трамп Хитой Халқ Республикасига расмий ташриф билан етиб келди. Мазкур сафар 2017 йилдан буён унинг Пекинга биринчи ташрифи ҳисобланади.
Ташриф доирасида Трамп Хитой раҳбари Си Цзинпин билан юқори даражадаги музокаралар ўтказмоқда. Учрашувлар Халқ вакиллари саройида бўлиб ўтмоқда ва томонлар АҚШ–Хитой муносабатларининг энг муҳим йўналишларини муҳокама қилмоқда.
Музокараларнинг марказий йўналиши сифатида иқтисодий ҳамкорлик, савдо балансидаги тафовутлар ҳамда технологик соҳадаги рақобат қайд этилмоқда. Хусусан, АҚШ томони Хитой бозорини америкалик йирик технологик компаниялар учун кенгроқ очиш масаласини кўтариши кутилмоқда.
Пекин эса ўз навбатида Вашингтон билан савдо зиддиятларини юмшатиш, бож сиёсатини барқарорлаштириш ҳамда мавжуд вақтинчалик келишувларни узайтиришдан манфаатдор экани айтилмоқда.
Трамп Пекинга етиб келгач, юқори даражадаги расмийлар томонидан кутиб олинди. Кутиб олиш маросими доирасида ҳарбий оркестр ва икки давлат байроқлари билан безатилган тантанали тадбир ташкил этилди.
Халқ вакиллари саройида музокаралар бошланишидан аввал томонлар қисқа баёнотлар билан чиқиш қилди.
Си Цзинпин глобал геосиёсий вазият кескинлашиб бораётганини таъкидлаб, “дунё миқёсида мисли кўрилмаган ўзгаришлар даври” юз бераётганини қайд этди ҳамда АҚШ ва Хитой ўртасидаги ҳамкорлик глобал барқарорлик учун муҳимлигини билдирди.
Трамп эса икки давлат ўртасида мавжуд муаммолар бўлишига қарамай, уларни тезкор дипломатик мулоқот орқали ҳал қилиш мумкинлигини таъкидлади. У Си Цзинпинни “қатъиятли ва буюк етакчи” сифатида баҳолаган ҳолда, музокаралардан ижобий натижалар кутаётганини билдирди.
Ташриф давомида томонлар нафақат савдо-иқтисодий масалалар, балки глобал сиёсий кун тартибини ҳам муҳокама қилиши кутилмоқда. Хусусан, Эрон атрофидаги вазият, Тайван масаласи ва технологик чекловлар бўйича қарама-қаршиликлар кун тартибидан ўрин олиши мумкин.
Шунингдек, АҚШ ва Хитой ўртасидаги технологик рақобат, айниқса сунъий интеллект ва яримўтказгичлар ишлаб чиқариш соҳасидаги кескинлик ҳам музокараларнинг муҳим йўналишларидан бири бўлиб турибди.
Трамп билан бирга кенг таркибли делегация ҳам Пекинга келган. Унда АҚШнинг йирик технологик ва молиявий компаниялари раҳбарлари иштирок этмоқда. Жумладан, Nvidia, Apple, Tesla ва BlackRock каби компаниялар раҳбарлари делегация таркибида экани қайд этилган.
Мутахассислар фикрича, бизнес элитанинг музокараларда иштирок этиши АҚШ–Хитой иқтисодий алоқаларида янги механизмлар шаклланиши эҳтимолини кучайтиради, айниқса чиплар ва сунъий интеллект технологиялари бозорида.
Ташриф дастурига мувофиқ, расмий музокаралардан ташқари давлат зиёфати, қўшимча икки томонлама учрашувлар ҳамда ишчи тушликлар ўтказилиши режалаштирилган.
Ташриф якунида томонлар қўшма баёнот билан чиқиши мумкинлиги ҳам истисно этилмаяпти, бироқ экспертлар кескин стратегик келишувлар бўйича йирик ютуқлар эҳтимолини паст баҳоламоқда.
