Нетаняху уруш даврида БААга махфий ташриф буюрган
“Моссад” раҳбари ҳам можаро давомида ҳамкорликни мувофиқлаштириш мақсадида камида икки марта БААга борган.
Исроил Бош вазири Бинямин Нетаняху Эрон билан уруш даврида яширин равишда Бирлашган Араб Амирликларига ташриф буюргани маълум бўлди. Бу ҳақда Times of Israel хабар берди.
Бош вазир идораси хабарига кўра, Нетаняху БАА президенти Шайх Муҳаммад бин Зоид билан учрашув ўтказган. Идора баёнотида ушбу ташриф Исроил ва БАА ўртасидаги муносабатларда “тарихий ютуқ” бўлгани таъкидланган.
Аввалроқ АҚШнинг юқори мартабали амалдорлари Исроил Эрон билан уруш вақтида БААга “Ирон Dome” ҳаво мудофаа тизими ҳамда уни бошқарувчи ҳарбийларни юборганини тасдиқлаган эди.
The Wall Street Journal нашрининг араб амалдорлари ва вазиятдан хабардор манбаларга таяниб ёзишича, “Моссад” раҳбари Давид Барнеа ҳам можаро давомида ҳамкорликни мувофиқлаштириш мақсадида камида икки марта БААга борган.
Манбаларга кўра, Исроил ва БАА Эроннинг йирик нефть-кимё объектига уюштирилган ҳужумни ҳам мувофиқлаштирган бўлиши мумкин.
Эслатиб ўтамиз, Исроил ва БАА 2020 йилда дипломатик муносабатларни нормаллаштирган эди. 2018 йилда ҳам Нетаняхунинг Шайх Муҳаммад бин Зоид билан яширин учрашув учун БААга боргани ҳақида хабарлар тарқалган.
