Эпштейннинг ўзбекистонлик "қурбони" кўрсатма берди
18 ёшида Ўзбекистондан модель сифатида АҚШга олиб кетилган аёл Эпштейн уч йил давомида уни мунтазам зўрлаганини маълум қилди.
АҚШ Конгрессида ташкил этилган махсус эшитувда Жеффри Эпштейн ва унинг шериклари томонидан жинсий зўравонликка учраган аёллар кўрсатма берди. Улар орасида ўсмирлик даврида Ўзбекистондан модель сифатида ёлланган Роза исмли аёл ҳам бор эди. Бу ҳақда BBC хабар берди.
Маълум қилинишича, Роза Вакиллар палатасидаги демократлар томонидан Флорида штатининг Вест Палм Бич шаҳрида ташкил этилган норасмий эшитувда омма олдида чиқиш қилди. Демократ конгрессмен Роберт Гарсиянинг айтишича, айнан шу ҳудудда Эпштейннинг жиноятлари илк бор кенг жамоатчиликка маълум бўла бошлаган. Эшитув Доналд Трaмпнинг Мар-а-Лаго қароргоҳига яқин ҳудудда ўтказилгани ҳам алоҳида таъкидланди.
Роза ўз кўрсатмасида 2008 йилда, 18 ёшида Эпштейннинг шериги ва франциялик модель агенти Жин-Люк Брунел (вафот этган) билан танишганини айтди. Унга халқаро модель карераси ваъда қилинган.
“Молиявий жиҳатдан беқарор оиладан чиққаним учун мен идеал нишон эдим”, — деди у Конгрессдаги чиқиши вақтида.
Унинг айтишича, 2009 йил май ойида виза билан Нью-Йоркка келган ва орадан икки ой ўтиб Брунел уни Жеффри Эпштейн билан таништирган. Ўша пайтда Эпштейн вояга етмаган шахсни фоҳишаликка жалб қилиш айби билан судланганидан кейин Флорида штатида уй қамоғида эди.
Роза айнан шу ҳолатга алоҳида урғу бериб, Эпштейн судланган ва расман назорат остида бўлганига қарамай, янги қурбонларни топишда давом этганини айтди.
Унинг сўзларига кўра, Эпштейн унга Флорида илм-фан жамғармасида ишлашни таклиф қилган. Бу фонд Эпштейннинг 2008 йилги ҳукмидан кейинги махсус келишув асосида фаолият юритган даврига тўғри келади. Ўша келишувга кўра, Эпштейн қамоқда бўлишига қарамай ҳафтасига олти кун, кунига 16 соатгача ташқарига чиқиш ҳуқуқига эга бўлган.
Демократ қонунчилар айнан шу plea deal — айбни тан олиш эвазига енгилроқ жазони назарда тутувчи келишувни кескин танқид қилди. Уларнинг фикрича, бу келишув Эпштейннинг амалда жазо тизимидан четда қолишига ва яна йиллар давомида зўравонлик ҳамда одам савдоси билан шуғулланишига имкон яратган.
Роза Конгрессга берган кўрсатмасида уй қамоғида бўлган Эпштейн томонидан қандай зўравонликка учраганини ҳам айтди.
“Бир куни унинг массажчиси мени хонасига чақирди ва Жеффри томонидан илк бор жинсий тажовузга учрадим. Кейинги уч йил давомида мунтазам зўрлашга дучор бўлдим”, — деди у.
У Эпштейннинг судланган бўлишига қарамай бемалол ҳаракатланаётгани ва катта таъсир доирасига эгалигини кўриб, адолатга эришиш деярли имконсиздек туюлганини билдирди.
Демократ қонунчилар эшитув давомида Эпштейн ва унинг шериклари йиллар давомида жавобгарликдан қочиб юргани, жабрланувчилар эса ҳуқуқ тизими томонидан бир неча бор ҳимоясиз қолдирилгани ҳақида гапирди.
Роза шунингдек, АҚШ Адлия вазирлиги томонидан эълон қилинган Эпштейн файлларида унинг исми тасодифан ошкор бўлиб кетганини айтиб, бу ҳолат яна руҳий зарба берганини билдирди.
“Бой ва қудратли одамларнинг исмлари ёпиқ қолмоқда, аммо жабрланувчиларнинг маълумотлари ошкор бўлиб кетди”, — деди у.
Унинг айтишича, ҳужжатлар эълон қилинганидан кейин турли давлатлардан журналистлар ва нотаниш одамлар у билан боғлана бошлаган.
“Энди мен доим ортимга қараб яшашга мажбурман. Бу хато ҳаётимга узоқ муддатда қандай таъсир қилишини тасаввур ҳам қила олмайман”, — деди Роза.
АҚШ Адлия вазирлиги эса жабрланувчилар шахсини ҳимоя қилиш масаласига жиддий ёндашишини билдирган. Вазирлик айрим ҳужжатларда шахслар маълумоти нотўғри таҳрир сабаб ошкор бўлиб кетганини ва бунга техник ёки инсоний омиллар сабаб бўлганини маълум қилган.
Эшитувда Эпштейн қурбонларидан яна бири — Мария Фармер ҳам олдиндан ёзиб олинган видеомурожаат орқали қатнашди. У Эпштейн ҳақида илк бор 1996 йилда ҳуқуқни муҳофаза қилувчи органларга хабар берганини ва расмийлар йиллар давомида етарли чоралар кўрмаганини айтди.
“Ҳукумат ҳақиқатни айта бошлаши керак”, — деди у.
Жеффри Эпштейн 2019 йил 10 август куни Нью-Йоркдаги қамоқхонада жинсий савдо айбловлари бўйича суд жараёнини кутаётган пайтда вафот этган. У 2008 йилда вояга етмаган шахсни фоҳишаликка жалб қилиш айби билан судланган ва жинсий жиноятчи сифатида рўйхатга олинган эди.
