Ўзбекистонда туғилганлик ҳақидаги маълумотномани энди онлайн олиш мумкин
2023-йилдан кейин туғилган болалар учун туғилганлик ҳақидаги маълумотнома электрон шаклда тақдим этилади.
Ўзбекистонда туғилганлик ҳақидаги маълумотномани эндиликда онлайн тарзда олиш имконияти яратилди. Янги хизмат орқали фуқаролар туғилганлик ҳақида далолатнома ёзуви қайд этилганлиги тўғрисидаги маълумотномани my.gov.uz портали орқали электрон шаклда юклаб олишлари мумкин бўлади.
Қайд этилишича, Вазирлар Маҳкамасининг 550-сон қарорига мувофиқ, 2023 йилдан бошлаб туғилганликни қайд этиш комплекс давлат хизмати асосида амалга оширилмоқда. Мазкур тартибга кўра, туғруқхона чақалоқ ҳақидаги маълумотларни электрон тарзда ФҲДЁ органларига юборади ва ҳужжатлар автоматик шакллантирилади.
Аввал фақат туғруқхона томонидан QR-кодли шаклда берилган маълумотнома энди my.gov.uz портали орқали ҳам тақдим этилади. Ушбу ҳужжат туғилганлик ҳақидаги гербли гувоҳномага тенглаштирилган.
Хизматдан фойдаланиш учун фойдаланувчи my.gov.uz порталига ЭРИ ёки OneID орқали киради. Фарзанд туғилганлиги ФҲДЁ органида қайд этилгач, онанинг шахсий кабинетига электрон хабарнома юборилади. Сўнг “Маълумотномалар” бўлими орқали керакли ҳужжатни юклаб олиш мумкин бўлади.
Мазкур хизмат бепул тақдим этилади ҳамда ортиқча қоғозбозликни бартараф этади. Шунингдек, маълумотнома йўқолган тақдирда уни исталган вақтда портал орқали қайта юклаб олиш имконияти мавжуд.
Таъкидланишича, хизмат 2023 йил ва ундан кейин туғилган болалар учун амал қилади.
