Исроилликларнинг аксарияти Нетаняхунинг сиёсатдан кетишини истамоқда

Исроилда ўтказилган янги сўровнома натижаларига кўра, фуқароларнинг аксарияти бош вазир Бинямин Нетаняхунинг яқинлашаётган Кнессет сайловларида қатнашмаслиги ва сиёсатдан кетишини қўллаб-қувватламоқда. Бу ҳақда Maariv газетасига таяниб, Jerusalem Post хабар берди.

 

Газета эълон қилган тадқиқотга кўра, респондентларнинг 55 фоизи Нетаняху сиёсий фаолиятини якунлаши керак деб ҳисоблайди. 38 фоиз иштирокчи эса унинг Ликуд партиясига етакчилик қилган ҳолда сайловда қатнашишини маъқуллаган. Яна 7 фоиз респондент бу борада аниқ фикр билдирмаган.

 

Сўров натижалари ҳукмрон коалициянинг парламентдаги позицияси заифлашаётганини ҳам кўрсатган. Тадқиқотга кўра, Ликуд ва Итамар Бен-Гвирнинг “Отзма Еҳудит” партияси биттадан мандат йўқотмоқда. Натижада ҳукмрон коалиция 49 ўрин билан чекланмоқда.

 

Шу билан бирга, мухолифат блокининг кўрсаткичлари яхшиланиб, араб партияларисиз ҳисобланганда 61 мандатга етаётгани қайд этилган. Бу эса Кнессетда кўпчиликни шакллантириш учун етарли ҳисобланади.

 

Сўровнома айрим эҳтимолий сиёсий иттифоқларни ҳам таҳлил қилган. Хусусан, Гади Айзенкотнинг собиқ бош вазирлар Нафтали Беннет ва Яир Лапид билан бирлашиши ҳолатида қўшма рўйхат 49 мандат олиши мумкинлиги қайд этилган.

 

Тадқиқот Lazar Research маркази томонидан Panel4All ҳамкорлигида 12–13 май кунлари ўтказилган. Унда Исроилнинг 18 ёшдан катта 502 нафар яҳудий ва араб фуқароси иштирок этган.