Бибихоним мадрасасини нега Америка таъмирлаб беряпти?

 

Самарқанддаги Бибихоним мадрасасини нега Америка ҳукумати таъмирлаб беряпти? Ахир ҳар йили қўмитага ҳам, тарихий биноларни таъмирлаш ишларига ҳам бюджетдан катта маблағ ажратилади. Буни Ўзбекистон ўз ҳисобидан амалга ошира олмайдими? Zamon.uz журналистининг мазкур саволига Туризм қўмитаси раиси Абдулазиз Аққулов Туризм соҳасида амалга оширилаётган ислоҳотлар бўйича ташкил этилган матбуот анжуманида жавоб берди.

Раиснинг таъкидлашича, ушбу тарихий обиданинг реставрацияси масаласи давлат раҳбари эътиборидаги муҳим йўналишлардан бири бўлиб, ишлар аввало чуқур илмий ва техник ўрганишларни талаб этади.

Бинонинг ички ҳолатини тўлиқ баҳолаш, тегишли ўрганишлар ўтказиш ҳамда тўғри реставрация усулини белгилаш учун мутахассислар томонидан комплекс тадқиқотлар олиб борилиши зарур. Ушбу жараён эса маълум вақтни талаб этади.

Шунингдек, тарихий обидаларни тиклаш ва консервация қилиш соҳасида хорижий мутахассисларнинг тажрибаси муҳим аҳамият касб этиши таъкидланди.

“Мутахассислар асосий муаммо, улар томонидан аниқ хулоса берилса, реставрация ишлари Ўзбекистоннинг ўзи ҳам тегишли дирекциялари томонидан амалга ошириши мумкин. Молиялаштириш масаласида эса давлат раҳбари томонидан барча харажатларни қоплашга тайёрлик билдирилган,” — деди Абдулазиз Аққулов.

Қайд этилишича, жараён шошилинч эмас, балки эҳтиёткорлик ва илмий ёндашув асосида олиб борилади. Дастлабки ўрганиш ишлари ярим йилдан бир йилгача давом этиши мумкин.

Мутасаддилар таъкидлашича, ушбу турдаги реставрация ишларида халқаро тажриба ва технологияларни жалб қилиш муҳим бўлиб, жараённи бошлаган мутахассислардан уни якунига етказиши ҳам талаб этилади.