Тошкент – Иссиқкўл йўналишида янги авиақатнов йўлга қўйилади
Дастлабки рейс 2026 йил 24 июнда Тошкент – Тамчи йўналишида амалга оширилиши кутилмоқда.
2026 йил 15 май куни “Ўзбекистон аэропортлари” АЖда Қирғизистоннинг “Asman Airlines” авиакомпанияси вакиллари билан учрашув бўлиб ўтди. Унда икки давлат ўртасида йўловчи ташиш йўналишларини кенгайтириш, янги авиайўналишлар очиш ҳамда мавжуд аэропортлар ўртасидаги ҳамкорликни мустаҳкамлаш масалалари муҳокама қилинди.
Музокаралар давомида “Asman Airlines” авиакомпанияси Тошкент халқаро аэропорти ҳамда Қирғизистон аэропортлари ўртасида мунтазам парвозларни йўлга қўйиш бўйича ўз режаларини тақдим этди.
Дастлабки босқичда Тошкент – Тамчи (Иссиқкўл) йўналишида мунтазам рейсларни йўлга қўйиш кўзда тутилган бўлиб, ушбу парвозларни 2026 йил 24 июндан бошлаш режалаштирилган. Рейслар “Dash 8-400” туридаги ҳаво кемаларида амалга оширилиши белгиланган.
Шунингдек, келгусида авиакомпания маршрут тармоғини кенгайтириш ҳам режалаштирилган. Хусусан, куз мавсумига қадар Тошкент – Ош йўналишида, қиш мавсумида эса Тошкент – Қоракўл йўналишида рейсларни йўлга қўйиш масалалари кўриб чиқилмоқда. Бундан ташқари, Тошкент – Бишкек йўналишида ҳам мунтазам авиқатновларни очиш имконияти ўрганилмоқда.
“Asman Airlines” Қирғизистоннинг давлат авиакомпанияси бўлиб, “Қирғизистон аэропортлари” АЖ таркибидаги шўба корхона ҳисобланади. Ҳозирда авиакомпания ички йўналишлар билан бирга Олмаота ва Хўжанд каби халқаро йўналишларда ҳам парвозларни амалга ошириб келмоқда.
