Тошкентда ҳайдовчинг жаримаси 311 млн сўмдан ошди
У 2024 йил апрель ойидан бошлаб йўл ҳаракати қоидаларини 912 марта бузган. Жарималарни ўз вақтида тўламаган.
Тошкент шаҳрида йўл ҳаракати қоидаларини мунтазам равишда қўпол бузиб келган “Матиз” автомобили ҳайдовчисига нисбатан 311 миллион сўмдан ортиқ қарздорлик шаклланди. Бу ҳақда Мажбурий ижро бюроси хабар берди.
Маълумотларга кўра, МИБ Тошкент шаҳар бошқармаси 2-туманлараро бўлими иш юритувида Тошкент шаҳар ИИББ ЙҲХБ томонидан чиқарилган маъмурий қарорлар асосида ижро ҳужжатлари юритилган.
Аниқланишича, фуқарога тегишли “Матиз” автомобили 2024 йил апрель ойидан бошлаб йўл ҳаракати қоидаларини мунтазам бузиб келган. Натижада жами 912 та маъмурий жарима расмийлаштирилиб, умумий қарздорлик 311 миллион сўмдан ошган.
Идора маълумотида қайд этилишича, ҳайдовчи йўл ҳаракати қоидаларига амал қилмасликни одатга айлантирган, бироқ жарималарни ўз вақтида тўламаган. Оқибатда қарздорлик йиллар давомида ортиб борган ва автомобиль қидирувга берилган.
Олиб борилган тезкор қидирув ва мажбурий ижро ҳаракатлари натижасида мазкур транспорт воситаси аниқланиб, 2026 йил 15 май куни жарима майдонига жойлаштирилган.
Мутасаддилар йўл ҳаракати қоидалари инсон ҳаётини сақлашга хизмат қилувчи муҳим мезон эканини таъкидлаб, қоидаларга амал қилмаслик жиддий ҳуқуқий оқибатларга олиб келишини эслатди.
