Япония ноқонуний яшаган икки ўзбекистонликни депортация қилди
Фуқаролар Японияга ўқиш визаси билан кириб, қолиш муддати тугаганидан кейин ҳам мамлакатни тарк этмаган.
Япония Иммиграция хизматлари агентлиги мамлакат ҳудудида ноқонуний яшаб келган икки нафар Ўзбекистон фуқаросини депортация қилди. Бу ҳақда Япониянинг Ўзбекистондаги элчихонаси матбуот хизмати маълум қилди.
Қайд этилишича, фуқаролар Японияга ўқиш визаси асосида кирган. Бироқ уларнинг мамлакатда қонуний қолиш муддати якунланганидан сўнг ҳам Японияда қолиб кетгани аниқланган. Кейинчалик улар иммиграция қоидаларини бузгани сабабли ҳибсга олиниб, депортация қилинган.
Элчихона “талаба” мақомидаги виза фақат таълим олиш мақсадида берилишини, ундан ноқонуний ишлаш ёки мамлакатда қолиш воситаси сифатида фойдаланиш мумкин эмаслигини таъкидлади.
Шунингдек, ноқонуний яшаш ёки ишлаш ҳолатлари аниқланганда ҳуқуқбузарларга нисбатан қатъий чоралар қўлланилиши, жумладан, ҳибсга олиш, иммиграция марказига жойлаштириш ва депортация қилиш амалиёти қўлланилиши билдирилди.
Дипломатик ваколатхона фуқароларни “Японияда осон иш” каби шубҳали таклифларга ишонмасликка ҳамда қочқинлик мақоми орқали мамлакатда узоқ муддат қолиш мумкинлиги ҳақидаги нотўғри тушунчалардан эҳтиёт бўлишга чақирди.
