Ўзбекистон АҚШда ўрмонларни тиклаш бўйича ташаббусларини тақдим этди

Ўзбекистон Президентининг экология масалалари бўйича маслаҳатчиси — Экология ва иқлим ўзгариши миллий қўмитаси раиси Азиз Абдуҳакимов бошчилигидаги делегация АҚШнинг Нью-Ёрк шаҳрида ўтказилган БМТ Ўрмонлар бўйича форумининг 21-сессиясида иштирок этди. Тадбирда Ўзбекистон Республикасининг БМТдаги доимий вакили Улуғбек Лапасов ҳам қатнашди.

 

       

Форумда БМТга аъзо давлатлар делегациялари, вазирлар, халқаро ташкилотлар ва экологик конвенциялар ижрочи директорлари иштирок этиб, глобал ўрмон сиёсати, БМТ Ўрмонлар бўйича стратегик режасини амалга ошириш, “Глобал ўрмонлар ҳисоботи – 2026”ни тайёрлаш ҳамда ўрмон секторини иқлим ва сув кун тартибига интеграция қилиш масалалари муҳокама қилинди.

Форумнинг очилишида сўзга чиққан Азиз Абдуҳакимов чўлланиш ва иқлим ўзгаришига қарши курашда ўрмонларнинг ўрни муҳим эканини таъкидлади. У Орол денгизи фожиаси оқибатлари, хусусан, қуриган ҳудуднинг Оролқум чўлига айланганига алоҳида тўхталди.

 

       

Шунингдек, Президент Шавкат Мирзиёев ташаббуси билан амалга оширилаётган “Яшил макон” умуммиллий лойиҳаси доирасида сўнгги беш йил ичида мамлакатда 1 миллиарддан ортиқ дарахт экилгани, яшил қоплам даражаси 8 фоиздан 14 фоизга ошгани қайд этилди. Ушбу кўрсаткични 2030 йилга бориб 30 фоизга етказиш мақсад қилинган.

Форум доирасида Ўзбекистон ва Конго Республикаси томонидан илгари сурилган 2027–2036 йилларни БМТ шафелигида “Ўрмон барпо этиш ва ўрмонларни тиклаш бўйича ҳаракатлар ўн йиллиги” деб эълон қилиш ташаббуси ҳам қўллаб-қувватланди.

Шунингдек, глобал даражада ўрмон барпо этиш бўйича йўл харитасини ишлаб чиқиш, чўлланишга қарши халқаро ҳамкорликни кенгайтириш, қурғоқчиликка чидамли турларни ривожлантириш ҳамда чанг ва қум бўронларига қарши эрта огоҳлантириш тизимларини жорий этиш таклиф этилди.

 

     

Бундан ташқари, Марказий Осиё давлатларининг 2035 йилгача 1,5 миллион гектар майдонда трансчегаравий ўрмонлар барпо этишни назарда тутувчи “Яшил қалқон” минтақавий ташаббуси ҳам тақдим этилди.

Форум доирасида FАО билан ҳамкорликда ташкил этилган махсус тадбирда Ўзбекистонда экологик ислоҳотлар — “Яшил макон”, «Биомерос», “Тоза ҳаво”, “Чиқиндидан холи ҳудуд” ва “Экологик маданият” дастурларининг амалий натижалари ҳам намойиш этилди.