Ўзбекистонда ноқонуний тамаки айланмаси 24,8 фоиздан 7 фоизга камайди

 

Тошкент шаҳрида “никотин муқобилларини тартибга солишнинг долзарблиги: жамоат саломатлиги ва иқтисодий манфаатлар мувозанати” мавзусида давра суҳбати ўтказилди.

Тадбир Замонавий журналистикани ривожлантириш маркази томонидан ташкил этилди. Унда давлат органлари вакиллари, соҳа мутахассислари ҳамда экспертлар иштирок этиб, Ўзбекистонда никотин маҳсулотларини тартибга солиш бўйича амалга оширилаётган ислоҳотлар, ноқонуний бозор улуши ва жамоат саломатлигини таъминлашда хавфга асосланган ёндашувнинг халқаро тажрибаси муҳокама қилинди.

 

       

Унда Алкоголь ва тамаки бозорини тартибга солиш инспекцияси вакиллари сўзга чиқиб, тамаки маҳсулотларининг ноқонуний айланмасига қарши курашиш, яширин иқтисодий фаолиятни аниқлаш ва олдини олишга қаратилган профилактик чора-тадбирлар самарадорлиги юзасидан маълумот берди.

 

     

Таъкидланишича, Иқтисодий жиноятларга қарши курашиш департаменти билан ҳамкорликда жами 1 655 та тезкор тадбир ўтказилган. Улар натижасида истеъмолга яроқсиз ҳамда инсон саломатлиги учун хавфли бўлган 48,7 млрд сўмлик алкоголь ва спирт маҳсулотлари ҳамда 49,3 млрд сўмлик тамаки маҳсулотлари муомаладан чиқарилган.

Шунингдек, амалга оширилаётган тизимли чора-тадбирлар натижасида ноқонуний тамаки айланмаси 2023 йилдаги 24,8 фоиздан 2025 йил якунига келиб 7 фоизгача камайтирилгани қайд этилди.

 

         

Йиғилиш давомида иштирокчилар яширин бозор туфайли юзага келаётган иқтисодий йўқотишлар, соҳани янада шаффоф тартибга солиш механизмлари ҳамда келгусидаги ислоҳотлар юзасидан фикр алмашдилар.

 

     

Давра суҳбати якунлари бўйича иштирокчилар томонидан Ўзбекистонда никотин муқобилларини тартибга солиш масалаларини келгусида экспертлар муҳокамасига тақдим этиш учун тавсия ва таклифлар тайёрланди.