Инсон ҳуқуқлари соҳасида ёш тадқиқотчиларни тайёрлаш лойиҳаси амалга оширилмоқда
Ушбу лойиҳа доирасида 18 май куни Инсон ҳуқуқлари бўйича Ўзбекистон Республикаси Миллий марказида халқаро эксперт профессор Полин Якобснинг оммавий маърузаси тингланди.
Инсон ҳуқуқлари бўйича Ўзбекистон Республикаси Миллий маркази томонидан Халқаро тараққиёт ва адолат маркази (CDJI) билан ҳамкорликда “Capstone Project Uzbekistan” лойиҳаси амалга оширилмоқда. Ушбу лойиҳа доирасида 18 май куни Инсон ҳуқуқлари бўйича Ўзбекистон Республикаси Миллий марказида халқаро эксперт профессор Полин Якобснинг оммавий маърузаси тингланди.
Инсон ҳуқуқлари бўйича Ўзбекистон Республикаси Миллий маркази директори, академик Акмал Саидов мазкур лойиҳанинг инсон ҳуқуқлари соҳасида янги авлод тадқиқотчиларини тайёрлашдаги стратегик аҳамиятини таъкидлади. Миллий марказ директори ўзининг табрик сўзида қайд этганидек, айни тадбир лойиҳанинг ишга тушириш босқичидан амалий илмий-тадқиқот фаолиятига ўтилганини англатади.
Халқаро тараққиёт ва адолат маркази (CDJI) дастурлар раҳбари Анел Тлеукеш ҳам ўз табрик сўзларини изҳор этди.
Тадбир Инсон ҳуқуқлари бўйича Ўзбекистон Республикаси Миллий маркази томонидан Халқаро тараққиёт ва адолат маркази (CDJI) билан ҳамкорликда, Нидерландия Қироллигининг Марказий Осиё мамлакатларидаги элчихонаси ва Тилбург университети кўмагида ташкил этилди. Маъруза 2026 йил 13 апрелда расман ишга туширилган “Capstone Project Uzbekistan” лойиҳасини амалга ошириш доирасида ўтказилди.
Профессор Полин Якобс Нидерландия Қироллигининг Тилбург университети Жиноят ҳуқуқи ва жиноят процесси кафедраси доценти ҳисобланади. Унинг оммавий маърузаси "Умрбод озодликдан маҳрум этишга нисбатан инсон ҳуқуқлари истиқболлари" мавзусига бағишланди.
Халқаро эксперт ушбу соҳадаги Европа стандартларининг қиёсий таҳлилини, Инсон ҳуқуқлари бўйича Европа судининг прецедент амалиётини, шунингдек, Тилбург университетининг жиноят-ижроия ҳуқуқи соҳасидаги илмий тадқиқотларга ёндашувларини тақдим этди. Адолат, жамоат хавфсизлиги ва инсоннинг асосий ҳуқуқларига риоя этиш тамойилларининг ўзаро нисбати масалаларига, шунингдек, маҳкумларни реабилитация қилиш ва ижтимоий реинтеграция қилиш имкониятларига алоҳида эътибор қаратилди.
Маъруза якунида савол-жавоб сессияси бўлиб ўтди. Унда тадбир иштирокчилари жиноят-ижроия сиёсати, жазо тизимини инсонпарварлаштириш ва миллий қонунчиликни инсон ҳуқуқлари бўйича халқаро стандартларга мувофиқлаштиришнинг долзарб масалаларини муҳокама қилдилар.
Тадбир доирасида Тошкент давлат юридик университети, Ўзбекистон Республикаси Ҳуқуқни муҳофаза қилиш академияси ва Ўзбекистон Республикаси Ички ишлар вазирлиги Академияси талабаларидан иборат лойиҳа иштирокчиларининг тўққизта жамоаси томонидан илмий-тадқиқот ташаббуслари тақдимоти бўлди.
Ушбу тадқиқотлар мавзулари замонавий инсон ҳуқуқлари фанининг энг долзарб йўналишларини қамраб олган. Бу ўринда, жумладан, рақамли муҳитда болалар ҳуқуқларини ҳимоя қилиш ва сунъий интеллектдан фойдаланиш билан боғлиқ кибертаҳдидларга қарши курашиш; собиқ маҳкумларни рақобатбардош меҳнат бозорида ижтимоий реинтеграция қилиш; халқаро экологик масъулият контекстида Орол ҳалокатининг ҳуқуқий оқибатлари каби муҳим мавзулар ҳақида сўз бормоқда.
Ҳар бир тақдимот якунида профессор Полин Якоб иштирокчиларга батафсил эксперт шарҳлари бериб борди. Тадқиқот ишини янада ривожлантириш бўйича услубий тавсиялар ва халқаро тажрибани ҳисобга олган ҳолда илмий таҳлилни чуқурлаштириш йўналишлари кўрсатиб берилди.
Маълумки, “Capstone Project Uzbekistan” лойиҳаси ёш тадқиқотчиларда инсон ҳуқуқлари соҳасида замонавий илмий ва таҳлилий иш кўникмаларини ривожлантириш, шунингдек, Ўзбекистон ва халқаро илмий ҳамжамият ўртасидаги академик ҳамкорликни мустаҳкамлашга қаратилган.
Инсон ҳуқуқлари бўйича Ўзбекистон Республикаси Миллий марказининг матбуот хизмати
