Покистон Эрон уруши фонида Саудия Арабистонига минглаб аскар ва қирувчи самолётлар юборди

Покистонон Саудия Арабистонига 8 минг нафар ҳарбий хизматчи, қирувчи самолётлар эскадрильяси ҳамда ҳаво мудофааси тизимини жойлаштирди. Бу ҳақда Reuters агентлиги хавфсизлик ва ҳукуматдаги манбаларга таяниб хабар берди.

 

Маълумотларга кўра, кучлар ўтган йили имзоланган ўзаро мудофаа битими доирасида юборилган. Манбалар жойлаштирилган ҳарбийлар жанговар салоҳиятга эга эканини ва Саудия Арабистони ҳужумга учраган тақдирда қироллик армиясини қўллаб-қувватлаш учун мўлжалланганини билдирган.

 

Reuters ёзишича, Покистон апрель бошида Саудия Арабистонига асосан Хитой билан ҳамкорликда ишлаб чиқарилган JF-17 қирувчи самолётларидан иборат тахминан 16 та самолётни юборган. Шунингдек, икки эскадрилья дрон ва Хитойнинг HQ-9 ҳаво мудофааси тизими ҳам жўнатилгани айтилмоқда.

 

Манбаларга кўра, юборилган техника покистонлик ҳарбийлар томонидан бошқарилади, харажатларни эса Саудия Арабистони қоплайди. Бундан ташқари, зарурат туғилганда қўшимча куч юбориш мажбурияти ҳам мавжуд.

 

Хабарда қайд этилишича, Саудия ҳудудида аввалги битимлар асосида жанговар вазифаларни бажарувчи минглаб покистонлик ҳарбийлар аллақачон жойлаштирилган. Махфий мудофаа битими эса қироллик чегараларини ҳимоя қилиш учун 80 минг нафаргача Покистон ҳарбийсини юбориш имконини беради.

 

Покистон армияси, мамлакат ташқи ишлар вазирлиги ва Саудия Арабистони расмийлари Reuters сўровларига жавоб бермаган.

 

Reuters'га кўра, Покистон Эрон билан можаро фонида бир вақтнинг ўзида воситачи ролини ҳам бажармоқда. Исломобод АҚШ ва Эрон ўртасидаги сулҳга эришилишида иштирок этган ҳамда икки томон ўртасидаги тинчлик музокараларига мезбонлик қилган.