Ўзбек-Қирғиз чегарасидаги можаро ҳал қилинди
Ижтимоий тармоқларда Риштон–Сўх йўналишида, Қирғизистоннинг “Қайпас” чегара ўтказиш пунктида юз берган ҳолат акс этган видео тарқалди. Унда Ўзбекистон фуқароси билан қирғиз чегарачилари ўртасида тортишув юзага келгани кўринади.
Сўнгги кунларда ижтимоий тармоқларда Риштон–Сўх йўналишидаги чегара-назорат ҳудудида содир бўлган ҳолат акс этган видеолавҳалар кенг муҳокамаларга сабаб бўлмоқда.
Сўх туман ҳокимлиги маълумотларига кўра, мазкур ҳолат Қирғизистоннинг «Қайпас» чегара ўтказиш пунктида юз берган бўлиб, ҳозирда вазият тўлиқ назоратга олинган ҳамда тегишли идоралар ҳамкорлигида ҳар томонлама ўрганилмоқда.
Дастлабки маълумотларга кўра, Қирғизистон чегара хизмати ходимлари ҳамда Сўх туманида яшовчи Ўзбекистон фуқароси ўртасида тушунмовчилик келиб чиққан.
Тезкор тарзда кўрилган чоралар натижасида фуқаро хавфсиз равишда Ўзбекистон ҳудудига олиб келинган.
Шунингдек, икки томон масъуллари ҳамда фуқаро иштирокида мулоқот ўтказилиб, юзага келган вазият тинч йўл билан ҳал этилгани маълум қилинган. Томонлар ўртасида ўзаро тушунмовчилик юзасидан узр сўралгани ҳам қайд этилган.
Расмийлар айрим ижтимоий тармоқларда мазкур ҳолат бўйича тасдиқланмаган, бир ёқлама ва ҳиссиётга берилган хабарлар тарқатилаётганига эътибор қаратди. Шу муносабат билан фуқаролардан текширилмаган маълумотларга ишонмаслик, вазиятга холис ва вазмин ёндашиш сўралмоқда.
Масъул идоралар томонидан таъкидланишича, Ўзбекистон ҳар бир фуқаросининг ҳуқуқ ва қонуний манфаатлари давлат томонидан ишончли ҳимоя қилинади. Бу каби ҳолатлар ваколатли идоралар томонидан доимий назоратда бўлади.
