Тошкентда МИБ орқали қурувчи компаниядан фуқарога салкам ярим млрд сўм ундириб берилди
Маълум бўлишича, қурувчи компания фуқародан уй учун олдиндан 100 фоиз тўлов қабул қилиб, хонадонни топширмаган. Тўланган пулларни ҳам қайтармаган.
Фуқаролик ишлари бўйича Яккасарой туманлараро судининг 2026 йил 14 мартдаги ижро варақасига асосан, қарздор “N.T.C.” МЧЖдан ундирувчи А.З. фойдасига 483 миллион 440 минг сўм қарз ундириш ҳақидаги ижро ҳужжати 2026 йил 17 март куни бўлим иш юритувига келиб тушган.
Мазкур ижро ҳужжати юзасидан шу куннинг ўзида Ўзбекистон Республикасининг “Суд ҳужжатлари ва бошқа органлар ҳужжатларини ижро этиш тўғрисида”ги Қонунининг 23-моддасига мувофиқ ижро иши қўзғатилиб, давлат ижрочиси томонидан кечиктириб бўлмайдиган ижро ҳаракатлари бошланган.
Мажбурий ижро ҳаракатлари давомида қарздор корхонанинг номидаги мол-мулк ва пул маблағларини аниқлаш мақсадида “МИБ портал” дастури орқали электрон онлайн сўровлар юборилиб, тегишли ташкилотлардан олинган маълумотларга асосан қарздорга тегишли ҳисоб рақамлари ва молиявий активлар аниқланди ҳамда уларга қонун тартибида банд солинди.
Шунингдек, “МИБ портал” дастури орқали қарздор МЧЖга хизмат кўрсатувчи банкдаги ҳисоб рақамларига инкассо топшириқномаси юборилди.
Олиб борилган қатъий ва самарали ижро чоралари натижасида фуқаро фойдасига қарийб ярим миллиард сўм пул маблағи тўлиқ ундириб берилди.
Шу тариқа, ижро ҳужжати талаблари амалда таъминланиб, ижро иши Қонуннинг 41-моддасига мувофиқ тамомланди.
