Ўзбекистон тарихида илк бор Миллий инвестиция жамғармаси Лондон фонд биржасига чиқади
18 май куни Лондон фонд биржасида Ўзбекистон Миллий инвестиция жамғармаси акцияларининг IPО жараёнига бағишланган расмий маросим бўлиб ўтади.
Жорий йил 18 май куни Лондон фонд биржасида Ўзбекистон Республикаси Миллий инвестиция жамғармаси акцияларининг бирламчи оммавий жойлаштирилиши (IPО) жараёнига бағишланган расмий маросим бўлиб ўтади.
Мазкур воқеа Ўзбекистон капитал бозори тарихидаги муҳим босқичлардан бири бўлиб, мамлакат иқтисодиётини халқаро молия майдонига интеграция қилиш йўлидаги навбатдаги йирик қадам сифатида баҳоланмоқда.
Миллий инвестиция жамғармасининг Лондон фонд биржасига чиқиши Президент Шавкат Мирзиёев ташаббуси билан амалга оширилаётган кенг кўламли иқтисодий ислоҳотлар, инвестициявий муҳитни яхшилаш, очиқлик ва шаффофлик тамойилларини мустаҳкамлаш борасидаги сиёсатнинг амалий натижаси ҳисобланади.
Кутилаётган IPО мамлакатнинг жаҳон молия бозорларидаги иштирокини кенгайтириш, хорижий инвестициялар оқимини ошириш ҳамда корпоратив бошқарувнинг замонавий стандартларини жорий этишга хизмат қилади. Шу билан бирга, мазкур жараён халқаро инвесторларнинг Ўзбекистонда олиб борилаётган таркибий ислоҳотларга бўлган ишончи ортиб бораётганини ҳам намоён этади.
Расмий маросимда Президенти Администрацияси раҳбари Саида Мирзиёева, Президентнинг иқтисодий сиёсат бўйича маслаҳатчиси Обид Ҳакимов ҳамда бошқа расмийлар иштирок этиши кутилмоқда.
Тадбир якунлари юзасидан қўшимча маълумот тақдим этилади.
